Anda di sini

Anang pechayaka berita selebubu bekaul vaksin Pfizer-BioNTech

Advertisement

MUKAH: Peranak kelebih agi ba kandang menua Daro patut anang pechayaka berita selebubu ti nadai pengamat bekaul enggau vaksin Pfizer-BioNTech.

Kaban Kunsil Nengeri Daro, Safiee Ahmad madahka pekara nya deka ngasuh mensia mayuh ditu berasai nangi.

“Tentuka pemadah nya amat kelebih agi ari opis pengerai enggau ejensi perintah ti megai tanggungpengawa sentang vaksin nya” ku iya madah ngagai Utusan Borneo.

Vaksin nya inisiatif perintah kena nagang penyakit COVID-19 lalu nya mega chara ke pemadu semitan nyata manggai ba  95 peratus.

Mayuh bala ketuai di dunya udah dituchuk vaksin nya lalu patut nyadi ke chunto ngambika enda berasai nangi.

Beratika penambah kes COVID-19 ba maya ke diatu, nyadi tanggungpengawa kitai ti nyadi rayat Malaysia enggau Sarawak, sama besaup nagang pengelekai penyakit nya, nengah chara dituchuk vaksin nya.

Enti penyakit nya ulih dipunaska, pengawa bukai ulih di tampung  baru baka  besekula enggau mayuh bengkah aktiviti kena mulaika pemanah ekonomi.

Iya meransang peranak di Daro ngambika setuju dituchuk vaksin nya kena nyaga pengelikun enggau pengerai sida.  

Vaksin Pfizer-BioNTech renggat keterubah dipadahka udah datai di Kuala Lumpur kena 21 Februari tu tadi lalu nya mih kena ngelaban pandemik COVID-19 ti udah ditapi menua kenyau ari ujung taun 2019 nyentuk ke diatu.

Advertisement