Anda di sini

Projek ngangkatmanah Jalai Kpg Tg Poting/Tg Sinibong/Tg Bawong dipejalai taun tu

Advertisement
 Harry (dua kiba) nyuaka chek pampas ngagai siku penerima seraya dikemata Anielia enggau Alfian.
TERIMA MIH: Harry (dua kiba) nyuaka chek pampas ngagai siku penerima seraya dikemata Anielia enggau Alfian.

BAU: Pengudah lima taun nganti, projek ngangkatmanah Jalai Kampung Tanjung Poting/Tanjung Sinibong/Tanjong Bawong di Singai, ditu deka berengkah dipejalai dalam taun tu.

Kaban Kunsil Nengeri (ADUN) Tasik Biru Datuk Harry Henry Jinep madah, projek tu ditangguhka laban perintah besai ti betukar pengudah pengawa bepilih parlimen 2018.

Nitih ku iya, projek nya dikemendar Menteri Pemansang Menua Pesisir enggau Kandang Menua, Datuk Seri Ismail Sabri Yaakub maya kimpin pengawa bepilih nengeri 2016.

Henry madahka dulu agi ari nya, iya minta ngagai Menteri meri agih belanja kena ngangkatmanah sebagi ari jalai ti suah kena ampuh bah maya ujan bangat.

“Tang, Menteri udah besetuju ngemendarka agih belanja ungkup semua jalai ti nyambung ketetiga genturung pendiau nya.

“Taja pia, ketegal bisi ubah dalam perintah besai, projek tu ditangguhka pengelama dua taun,” ku iya ba pengerami nyuaka simbolik chek pampas ba Opis Pelilih Menua Bau ditu, kemari.

Ku Harry madah, projek ti dilangkar nya nyangka enda ulih dipejalai nyema perintah Pakatan Harapan (PH) agi megai kuasa.

Berindik ari nya, iya meri terima kasih ngagai Perikatan Nasional sentang pemutus deka neruska projek ti dilangkar ke udah dipesetuju maya pegai Barisan Nasional.

Ku iya nambah, timpuh dua taun udah dipejera perintah PH.

“Sehari tu (Kemari), pampas udah dibayar ngagai pengempu tanah lalu pengudah tu Opis Menteri Kereja Raya deka ngemansutka tinda projek tu,” ku iya.

Beserimbai enggau nya, bisi 199 penerima udah nerima chek pampas beungkus RM1.768 juta.

Projek ti dilangkar tu udah dibagika ngagai lima pakej iya nya A, B, C, D enggau E.

Semina pengempu tanah ti bekaul dalam Pakej B ti nerima pampas sida kemari.

Ba pengerami simbolik ti digaga ba Opis Kaunsil Pelilih Menua Bau, semina tiga iku penerima ti nerima chek, lalu kelimpah ari nya sida ke bukai nerima chek ba Kampung Tanjung Poting kemari.

Sama bisi datai, Pemesai Pelilih Menua Bau Aniella Siam enggau Penguasa Tnah enggau Survei Bagi Menua Kuching Alfian Bawi.

Advertisement