MIRI: Bala menteri kabinet ba Kandang Menua Utara deka nyadi orang keterubah nerima tuchuk vaksin Pfizer-Bio NTech kena 6 Mac tu ditu.
Menteri Muda Dagang Temuai, Seni enggau Main Asal, Datuk Sebastian Ting madah siti program randau udah digaga enggau Menteri Perengka Pengangkut Datuk Lee Kim Shin ungkup tuju tu.
“Kami besetuju lalu nguluka pengari rayat ke bukai nerima tuchuk vaksin Pfizer-Bio NTech ba Miri kena 6 Mac tu begulai enggau raban pekereja rintai mua ditu,” ku iya maya Ngemunka Fat 2 Fit ti diatur Opis Bomba enggau Penyelamat Malaysia (JBPM Zon 6 Miri kemari.
Kaban Kunsil Nengeri (ADUN) Piasau nya madahka Kepala Menteri Datuk Patinggi Abang Johari Tun Openg nyadi individu keterubah di Sarawak dituchuk vaksin tu ari baruh Program Meri Vaksin COVID-19 kena 27 Februari tu.
“Aku empu endang enda sabar nerima tuchuk vaksin laban aku empu datai kediri megai tanggungpengawa nyadi pengari rayat.
“Pia mega, aku meransang diri sebilik, orang ti berimbai pendiau enggau komuniti ngambika sama nerima vaksin dalam pengawa ngurangka pengelekai COVID-19 dalam komuniti,” ku iya.
Nitih ku iya, juluk iya nya 80 peratus ari populasyen di nengeri tu nerima vaksin tu.
“Program meri vaksin tu dipejalai mayuh menua lalu endang patut komuniti betuchuk vaksin tu lalu enda nganti orang bukai ngaga bansa nya,” ku iya nerang.
Ku Sebastian madah, Renggat II enggau Renggat III dikhaska ngagai 80 peratus populasyen di Miri ti beumur 18 taun ke atas berengkah April nyentuk Ogos ti deka datai ba tujuh fasiliti meri vaksin ke udah ditetapka ba semua pelilih menua di Bagi Menua Miri.
Lebuh ditanya sekalika sektor dagang temuai di Sarawak dibuka pengudah Malaysia nerima tuchuk vaksin tu, Sebastian madahka tu nitihka pemutus perintah besai.
“Naka ke diatu bedau agi, kitai agi nganti pemujur pengawa meri vaksin di selampur menua lalu nyema pandemik COVID-19 ulih ditagang baru mih sektor dagang temuai dibuka baru,” ku iya.
Iya nerangka, taja pia perintah nengeri besedia muka sektor dagang temuai enggau 115 program dagang temuai ke udah dilangkar taun tu.
“Tanya nya ditu, sekalika sektor dagang temuai dibuka berindik enggau gaya pandemik COVID-19 laban kitai besedia enggau 115 program taun tu,” ku iya nerang.
Dulu ari nya, Sebastian udah nyuaka sepenyampau 3,000 sengkabung idung enggau mulut sereta kereban pengelikun iri (PPE) ngagai JPBM Zon 6 Miri.
Sama bisi datai Ketuai JBPM Zon 6 Miri Penguasa Kanan Bomba I Law Poh Kiong enggau Ketuai Balai Bomba enggau Penyelamat Marudi Maureen Sim.