Anda di sini

JPBN endang diatur raban profesional, ku Dr Annuar

Advertisement
 Dr Annuar lebuh ti ‘live’ di Facebook iya.
BEKUNSI PENERANG: Dr Annuar lebuh ti ‘live’ di Facebook iya.

SIBU: Raban pengatur Komiti Mutarka Penusah Ngenyit Bagi Menua Sibu Dr Annuar Rapaee nyakal penerang sekeda raban ti madahka Komiti Mutarka Penusah Ngenyit Nengeri (JPBN) patut diatur raban profesional ukai nya kaban politik.

Dr Annuar madahka raban ti ngemansutka penerang tu endang nyata bedau nemu raban orang ti dalam JPBN ngelama tu.

“Mayuh individu dalam JPBN iya nya entara ari raban profesional, staf perintah lalu ke pemadu beguna iya nya bala saintis.

Entara nya Kaban Jawatankuasa Khas Bebas Darurat 2021, Profesor Datu Dr Andrew Kiyu, Pakar Perunding Kanan Pediatrik Sepital Besai Sarawak Dr Ooi Mong How enggau Ketuai Unit Penyakit Berampit HUS Dr Chua Hock Hin.

“Semua sida tu ti meri input ngagai JPBN,” ku iya maya ti ngaga ‘Live’ Facebook, kemari.

Ku iya madah, pengawa tu mega sama ke digaga ba menua luar baka United Kingdom, ke alai ripot ninting hari COVID-19 dipadahka Menteri Besai Boris Johnso ti nerima input ari raban profesional enggau saintis.

Beserimbai enggau nya, penerang madahka JPBN tu enda diarika raban profesional tu endang enda ngena.

“Penerang tu semina ngayanka penyumbung orang nya ti nadai ujung pun, tang deka ngemansutka penerang,” ku iya.

Dr Annuar nyangkal penerang Ketuai Bagi Menua Parti Sarawak Bersatu (PSB) Pelawan Dr Low Chong Nguan ti madahka raban profesional patut diberi tanggungpengawa ngatur kes pengelekai igi penyakit COVID-19 di nengeri tu ari ti ngasuh kaban politik.

Low dalam penerang iya kena Hari Lima minggu nyin kemari, madahka rayat Sarawak ‘tekenyit’ enggau pemutus JPBN ti baru ke deka ngetuka pentin Atur Nagang Pemindah (PKP) di Sibu, Kanowit, Selangau, Song enggau Kapit.

Iya mega tekenyit enggau penerang ti dipadahka JPBN ke bejalaika PKP dulu ba Sibu enggau pelilih menua ti besemak kena nagang penambah kes kena rampit COVID-19.

Kelimpah ari nya, iya mega mantah penerang sekeda raban ti madahka pentin PKP enggau Atur Nagang Pemindah Bisi Penetap (PKPB) berengkah 16 Januari tu ti nyadi kebuah kes COVID-19 majak nambah di Bagi Menua Sibu.

“Meri aku awak meri penerang bepelasarka penemu saintifik. Kes di Sibu berengkah nambah kena 15, 16, 17 Februari nyentukka sehari tu (kemari).

“Patut dikeingat maya inkubasyen kena rampit COVID-19 iya nya 14 hari. Nyema kitai kena rampit sehari tu enda patut kitai positif maya diperesa pagila.

“Tu reti nya, nyema kitai ngetuka PKP kena 14 Februari, nyema deka meda asil bisi bejalaika PKP, kitai begunaka paling enda seminggu tauka dua minggu pengudah nya tang ukai tekala nya.

“Reti nya mega, sida ti diperesa positif dalam timpuh sebedau PKP tembu. Tu penerang saintifik ke mesti ditemu kita,” ku iya nerang.

Iya mega madahka PKP ti Diteritka (PKPD) ba Sibu Jaya berengkah dipejalai kenyau ar 12 Februari lalu mujur nyidi beratus kes COVID-19 ba kandang endur flat enggau Town Villa.

“Uji runding, nyema kitai enda bejalaika PKPD di kandang menua tu, mayuh sida ti kena rampit agi ngelawa genturung pendiau di kandang menua nya taja PKP laban nadai operasyen ngempang jalai.

“Tang, kami mujur nemu mayuh kes dia lalu kami bejalaika pengawa ngempang jalai di kandang menua nya,” ku iya.

Advertisement