SIBU: Komiti Pemansang enggau Pengelikun Genturung Pendiau (JKKK) ba tetiap rumah panjai beguna amat ba pengawa nyaup nagang pengelekai penyakit COVID-19 di menua pesisir.
Presiden Sarakup Indu Dayak Sarawak (SIDS) Dato Ir Alice Jawan Empaling madah, tetiap pengawa ti digaga ukai nya mesti nganti Tuai Rumah ngambika bejalaika bulu.
“Tetiap JKKK bisi biro diri empu. Bala ketuai biro ari baruh JKKK mesti bejalaika pengawa enggau atur ke terit kena nentuka tetiap prosedur operasyen standard (SOP) dititihka ba rumah panjai.
“Kerejasama semua peranak beguna amat kena nentuka rumah panjai selamat sereta nitihka SOP ti dibantaika perintah,” ku iya.
Iya madah munyi nya lebuh ke enggau ba program randau nengah ‘online’ begulai enggau bala ketuai gerempung ukai dikuasa perintah (NGO) Dayak sereta kaban akademik Dayak ba laman sosial Majlis Perbandaran Sibu (MPS) ti diatur Chairman MPS, Clarence Ting kemari.
Bela bisi enggau ba randau nya Ting, Kaban MPS Kaunsilor Augustine Merikan, Profesor Dr Jayum Jawan ari Universiti Putra Malaysia, Profesor Dr Lucy Sebli ari Unimas Malaysia Sarawak, Chairman Gerempung Bansa Dayak Sarawak (SDNU) Sibu Chambai Lindong, Sekretari Politik Kepala Menteri Romeo Christopher Tegong enggau Chairlady SIDS Sibu Angelyn Uchi Maseng.
Randau dalam jaku Iban diatur pengelama urung dua jam, lalu Dr Jayum nyadi monderator ti berandauka sentang atur ke pemadu baru nyengkaum nitihka prosedur operasyen standard (SOP) kena nagang rampit COVID-19 di rumah panjai, ke mungkur raban bansa Dayak ditu.
Ku Alice, JKKK ba tetiap rumah panjai mega tau numbuhka komiti khas kena nagang pengelekai COVID-19.
Ku iya, komiti khas nya mega bisi tanggungpengawa nyaga pekara peranak rumah panjai bekaul SOP, pengelantang pendiau enggau ke bukai ti bekaul enggau pandemik COVID-19.
Berebak enggau nya, iya minta ngambika SIDS enggau SDNU nyadi jematan entara perintah enggau peranak rumah panjai sekumbang pandemik tu.
Iya mega meri langgur penemu ngambika perintah meri bantu baka sengkabung idung enggau mulut sereta ‘sanitizer’ ngagai rumah panjai di nengeri tu.
“Kelimpah ari bantu bakul pemakai ti udah diberi, endang amat patut bantu nya diberi ba maya ke diatu.
“Dua elemen bantu nya beguna amat ba pengidup sekumbang maya pandemik tu. Di padahka mega bisi peranak rumah panjai ulih meli nya, lalu bisi mega enda tebelika nya.
“Nya alai, aku minta perintah berun dingka pekara tu,” ku iya nyemetak seraya n gelalau peranak rumah panjai ngambika anang dedayau di luar din.