KUCHING: Opis Menteri Pengerai Malaysia (KKM) udah ngemendarka agih belanja sepenyampau RM21 juta kena ngangkatmanah fasiliti, perengka sereta makmal sepital perintah di nengeri tu dalam ngangkatka kapasiti beperesa COVID-19.
Menteri Kandang Menua enggau Pengawa Berumah Dato Sri Dr Sim Kui Hian madahka KKM mega udah ngagihka belanja tambah RM36 juta ungkup nambahka 29 katil ba Unit Rawatn Rapi (ICU) enggau perengka berubat ke bukai di Sepital Sibu, Bintulu, Miri enggau Limbang.
“Taja pan opis pengerai ari baruh perintah besai, perintah Sarawak udah mantu mayar enggau lengkas makmal molekular perintah di Limbang enggau Kapit enggau tetiap nya RM1 juta ungkup peresa PCR COVID-19,” ku iya ba penerang.
Ku Dr Sim nambah, kapasiti beperesa COVID-19 di Sarawak sebedau tu iya nya 2,500 sehari.
Tang enggau agih belanja ti udah dikemendarka tu, Sarawak ulih meresa nyentukka 6,000 sampel sehari kena ngelengkaska agi pengeransing Sarawak ngelandaika garis kena rampit COVID-19.
Ku iya nambah agi, perintah nengeri mega udah mantu nambahka kapasiti peresa enggau nyendiaka belanja ungkup Kampus Bandar Universiti Malaysia Sarawak (UNIMAS), Pusat Perubatan Borneo (BMC) enggau Gribbles Pathology Malaysia.
Enggau semua kerejasama entara institusyen pengerai perintah sereta peribit, Sarawak nitih ku Dr Sim ulih bejalaika lebih ari 6,000 peresa PCR ungkup COVID-19 sehari.