KUCHING: Sarawak ngerikodka dua kes pemati baru ketegal COVID-19 di Sibu kemari.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang kemari madahka enggau dua kes pemati nya, tu lalu nyadika penyampau semua kes mati nambah ngagai 28 kes di nengeri tu.
Nitih ku iya, kes pemati ke-27 ti iya nya siku indu peranak menua (Sarawak) ti beumur 53 taun ke dianjung ngagai Sepital Sibu kena 20 Januari 2021 laban ti ngasai diri pedis deka enseput lalu terus dipasukka tiub kena mantu iya enseput.
“Kes udah disahka mati kena 20 Januari pukul 11.47 malam ba Sepital Sibu.
“Peresa rT-PCR udah digaga kena 21 Januari 2021 lalu ditemu positif COVID-19. Kes tu mega bisi rikod ‘ko-morbid’ baka penyakit kemi manis, penyakit darah tinggi enggau tungkul sengayuh,” ku iya seraya nambah kes tu iya nya ari Kluster Pasai.
Beserimbai enggau nya, ku Sekretariat, kes pemati ke-28 tu iya nya siku lelaki peranak menua (Sarawak) ti beumur 91 taun ke dipasukka ngagai Sepital Sibu kena 16 Januari 2021.
Kes tu ku iya udah dianjung ngagai Sepital Sibu ari siti palan ngibun laban ti bisi simptom tabin enggau batuk berengkah 15 Januari 2021.
“Peresa rT-PCR COVID-19 udah digaga kena 18 Januari 2021 lalu iya ditemu positif kena 21 Januari 2021.
“Gaya pengerai iya mega bisi berinsur lalu begunaka kereban mantu enseput. Kes udah disahka mati kena 23 Januari 2021 pukul 4.31 pagi di Sepital Sibu,” ku iya.
Ku Sekretariat nya nambah, kes tu mega bisi ko-morbid iya nya bisi penyakit darah tinggi, tungkul ati enggau strok.
“Bisi mega dipadahka iya nya kes tu ari Kluster Pasai. Beserimbai enggau tu, JPBNS mega ngenataika penyinu ati ngagai ruang biik sida ti midang,” ku iya.
Bekaul enggau penyampau kes baru positif COVID-19 di nengeri tu, Sekretariat madahka bisi 255 kes positif COVID-19 ti ditemu naka kemari.
Ari penyampau tu, Sibu ngerikodka kes ti tinggi iya nya 71 kes, lalu ditangkan Miri (57), Kanowit (30), Song (27), Betong (14), Dalat (9), Bintulu (9), Serian (8), Subis (8), Sarikei (5), Matu (5), Kapit (3), Sebauh (3), Kuching (2), Beluru (2), Bukit Mabong (1) enggau Tatau (1).
Tu nyadika penyampau semua kes positif COVID-19 di Sarawak niki ngagai 3,379 kes.
“Sehari tu (kemari) mega, bisi 107 kes baru ti udah gerai lalu dikemendar pulai ari Sepital Sibu (96), Sepital Miri (6) enggau Sepital Besai (5).
“Tu nyadika semua kes positif COVID-19 ti udah gerai lalu dikemendarka pulai nambah ngagai 1,700 tauka 50.31 peratus ari penyampau semua kes COVID-19 di Sarawak,” ku iya.
Pia mega penyampau kes ti agi diperubat lalu diengkahka ba wad isolasyen di sepital iya nya 1,647 iku.
“Sehari tu (Kemari) mega dipadahka bisi 379 orang ti dipelaba (PUI) baru udah diripotka lalu 101 PUI agi nganti pemutus makmal.
“Kelimpah ari nya bisi 508 orang ti dikemata (PUS) udah ngerejister masuk ke hotel ngambika kena kuarantin,” ku iya.