LIMBANG: Inisiatif peranak ba beberapa rumah panjai di Sarawak nyengkaum di Batu Danau ti ngelekatka notis nagang penama orang ari luar, ulih nagang COVID-19 ngelekai ke menua pesisir enggau kandang menua ulu entigis.
Kaban Kunsil Nengeri Batu Danau Paulus Palu Gumbang madah, peranak rumah panjai di pelilih menua nya nemu sereta bejalaika atur ti nyadi siti pekara ke manah ti tau pulaika pemaik ngagai semua, kena nagang pengelekai pandemik nya.
“Mayuh rumah panjai dalam sitak Batu Danau ngambi inisiatif enda ngemendarka orang luar ngelawa rumah panjai sida.
“Sida mega ngelekatka notis ba jalai nuju rumah panjai sida kelebih agi ba kandang menua Ulu Lubai, ti nagang temuai ari luar nemuai ngagai rumah panjai sida ti nyadi inisiatif kena nagang pengelekai COVID-19,” ku iya lebuh dirandau media ba Pengerami Nyuaka Geran Fasa Keempat 2020 sitak DUN Batu Danau di Dewan Bunga Raya Limbang, kemari.
Sama bisi datai, Kunsil Pelilih Limbang Mohd Firhan Iskandar Goh enggau Pemesai Khas Paulus Jimmy Ngindang.
Ku Paulus, peranak rumah panjai mega anang ngatur program enggau gempuru sosial kena nagang pengelekai virus nya.
“(Tu mandangka) sida deka bejalaika tanggungpengawa nentuka ruang bilik enggau nembiak redak enda dirampit (COVID-19).
“Pengawa tu dipejalaika nyentuk ke gaya COVID-19 pulai manah baru,” ku iya.
Ku iya, tebal agi rumah panjai nya jauh di ulu enti lalu dipelabaka virus nya tau ngelekai kia dibai orang luar ti nemuai ngagai menua nya.
Berebak enggau nya ku iya, sida nadai nerima ripot bisi penanggul kurang stok barang ke diguna ba kandang menua ulu entigis diatu, berindik ari pengawa bejalaika Atur Nagang Pemindah (PKP) enggau PKP Bisi Penetap (PKPB) di Sarawak.
Ba pengerami nya, bisi RM543,000 geran enggau duit ADUN sereta belanja khas Menteri Besai ke sepenyampau RM200,000 diberi ngagai lebih 50 penerima ti mungkur Komiti Pemansang enggau Pengelikun Genturung Pendiau (JKKK), serakup, kelab enggau Gerempung Ukai Dikuasa Perintah (NGO).