MIRI: Genturung pendiau Penan di Long Tujang enggau Long Buang ngembuan potensial nyadi pengeluar nanas manis enggau bisi kualiti, pengudah aja projek nanam nanas MD2 enggau N36 ti udah berengkah ditu, lalu udah dipeda ngemansutka asil dalam timpuh urung setaun ari diatu.
Kaban Kunsil Nengeri (ADUN) Telang Usan Dennis Ngau madah, nanas ti ditanam di kandang menua tu ulih dijual ke luar kandang menua Miri kelimpah ari Baram.
“Pengudah ngatur sekeda program ngelawa ke Long Tujang enggau Long buang, Opis Betanam Betupi Baram meda kededua genturung pendiau tu ngembuan potensial ungkup produk nanas.
“Aku andal ati laban projek tu bulih sukung enggau diterima ari komuniti di kededua genturung pendiau tu. Aku pechaya enggau pengeransing, dalam timpuh setaun peranak ditu ulih ngumpul asdil nya,” ku Dennis.
Iya madah munyi nya ba pengerami nyuaka benih (paung nanas) enggau kereban betanam ngagai 60 iku pesereta projek nanam nanas di Long Tujang, Sungai Apoh bedau lama ti udah.
Tiap iku sida nerima 775 paung nanas MD2 enggau N36, sum, pemanchit sereta kereban dikena betanam ke bukai sepenyampau RM6,750 ti dipelanja perintah nengeri nengah Program Tabung Fasilitasi Pertanian (AFF).
Nanas MD2 ambika chunto, iya nya siti bansa nanas ari Opis Betanam Betupi ti majak mayuh ditanam kelimpah ngembuan peminta ti tinggi ba dagang.
Ku Dennis madah, tuan nyin kemari printah nengeri ngagihka sepenyampau RM1 juta ungkup tetiap DUN ngenegapka projek betanam betupi.
Naka ke diatu, lebih 179 buah ruang bilik ari lebih 30 buah rumah panjai di Telang Usan udah dikemendarka peminta ungkup projek nanam nanad, sayur, ikan, betupi jelu, kereban kena ngaga kek enggau aktiviti betanam ke bukai ari baruh AFF.
“Singkang perintah nengeri nyendiaka agih belanja iya nya siti pengawa ti manah kena mantu komuniti menua pesisir nambah penatai pemisi enggau aktiviti betanam betupi.
“Sebedau tu, pesereta diberi lati pemun enggau kereban dikena bejalaika pengawa. Aku ngarapka pesereta ngena memanah peluang tu,” ku iya nambah.
Sama bisi iya nya pemesai ari Stesyen Betanam Betupi Long Lama Julius Raymond, Ketuai Genturung Pendiau Long Tujang ALung Jok enggau Ketuai Genturung Pendiau Long Buang Melai Bali.