KUCHING: Bantu Khas Sarawakku Sayang (BKSS) 5.0 ti dipadahka perintah Gabungan Parti Sarawak (GPS) kena Hari Empat nyin tadi ulih ngelempungka tating penusah ruang bilik sereta orang dagang ti tekeruga ari sukut penatai pemisi.
Menteri Muda Pengelantang Komuniti Datuk Francis Harden Hollis madahka rayat nengeri tu chukup betuah dipegai Kepala Menteri Datuk Patinggi Abang Johari Tun Openg ti endang ngemeratka rayat.
“Lebuh rayat napi pemar pandemik COVID-19 kenyau ari pentin Atur Nagang Pemindah (PKP) keterubah ti dipejalai ari 18 Mac 2020, mayuh bantu udah diberi ngagai rayat.
“Diatu pandemik COVID-19 dipadahka udah masuk ngagai gelumbang ketiga lalu udah ngelekai di kandang menua pesisir lalu bisi sekeda kluster udah ditemu.
“Berindik ari nya perintah GPS neruska bantu ngagai rayat nengah BKSS 5.0 ti beungkus RM405 juta,” ku iya nengah siti penerang media.
Ku iya, bisi 11 chara udah dibantaika perintah ari baruh BKSS 5.0 ti dipadahka kena Hari Empat nyin tadi.
Entara nya diskaun bil elekterik, ai enggau suwa pasar sereta bansal dagang, bayar chukai pintu, suwa Skim Perumahan Perbadanan Pembangunan Perumahan Sarawak (HDC) sereta chukai tanah.
Sama mega enda dibayar iya nya permit enggau lisin dagang sereta enda ibuh mayar suwa ungkup pedagang mit enggau jelan pemesai (PKS) ti beoperasyen ba premis dagang ti diempu ‘badan-badan berkanun’ enggau kompeni ti bekaul enggau perintah nengeri.
“Bantu tu enggau beberap bantu ke bukai ti enda dipadahka chukup ngelantangka ati rayat Sarawak ti tekeruga taja timpuh bantu tu nyentukka ujung bulan Jun 2021.
“Sama mih kitai besampi lalu ngambi bagi dalam mutuska rentayan pandemik COVID-19 ngambika kitai ulih neruska idup ninting hari baka ti sebedau COVID-19 nyadi ba dunya.” ku iya.