TATAU: Bakul Pemakai Sarawakku Sayang, inisiatif perintah Gabungan Parti Sarawak (GPS) kena ngelempungka tating penusah rayat ketegal pengawa bejalaika Aur Nagang Pemindah (PKP) enggau PKP Bisi Penetap (PKPB).
Menteri Muda ba Opis Kepala Menteri (Undang-Undang enggau Adat Bumiputera) ke mega ADUN Kakus Datuk John Sikie Tayai madah, perintah GPS nemu gaya kes COVID-19 ke pemadu baru nyadi di nengeri tu, nyengkaum sitak Kakus.
Nya alai ku iya, bantu nya disadung ngagai rumah panjai dalam sitak DUN Kakus ke mega sebagi ari nya ari baruh PKP dalam Pelilih Selangau lalu ke bukai nya ari baruh PKPB.
Kandang menua ti nerima bantu nya ensanus iya nya Sungai Anak, Sungai Tau, Sungai Arip enggau Rumah Steven Ansi, Lubok Bukut, ku iya.
“Lebih 1,080 Ketuai Ruang Bilik (KIR) ari 67 rumah panjai di Kakus bulih bantu tu.
“Aku nemu nya enda umbas tang bantu tu ulih ngelempungka tating penusah sida ketegal pengawa bejalaika PKP/PKPB,” ku iya lebuh dikerandau kemari.
Pengawa nyadung bakul pemakai nya dipejalaika Palan Servis DUN Kakus enggau Volunteer GPS DUN Kakus ti betuaika Eugene John Sikie enggau Penghulu Alister Alli Digat.
Bisi 538 iti semua penyampau bakul pemakai ke disadung maya nya.
Pengawa nyuaka bantu nya berengkah ari Rumah Malang, Sungai Bawang ti nangkanka nya disadung ngagai 12 rumah panjai ke bukai sepenyampau 184, Rumah Dom Brok, Sungai Tau ungkup empat rumah panjai bukai (78), Rumah Sulang Batu 88 Jalai Tatau/Selangau disadung ngagai semilan rumah panjai bukai (132) enggau Rumah Dicka Anthony, Sungai Anak ungkup tujuh rumah panjai bukai (132).
“Aku gaga ati laban Pelilih Tatau mengkang bestatus Gadung, tang kitai semampai bejejaga sereta sama bepadah ngagai bala bukai ngambika enda nurun ke pasar enti nadai kebuah ti berat, pengudah bisi nyadi kes ti majak nambah ba beberapa buah rumah panjai di menua pesisir nengeri tu,” ku Sikie.
Nya alai, iya minta bala ketuai raban bansa bejalaika tanggungpengawa neritka prosedur operasyen standard (SOP) ti ditetapka perintah kena nyaga pengelikun enggau pengerai peranak ke ari baruh jaga sida baka ti diajar dalam siri Woksyop Kepolisan Komuniti, ti diatur taun siti nyin tadi.
“Aku mega ngelalau peranak ditu ngambika anang ngatur pengerami sosial, pengerami besai enggau beraban kena nentuka sida nitihka SOP ti ditetapka enti maya bisi penusah rabat.
“Aku ngelalau peranak ditu ngena sengkabung mulut enggau idung,ngasika seraka fizikal, suah nuchi jari ngena ‘sanitizer’ jari kena nyeliahka rampit penyakit tu,” ku iya.
Iya mega meri terima kasih ngagai bala ke gawa enggau volunteer Palan Servis Raban Bansa DUN Kakus, ti enda ngira pengelelak nyadung bantu nya ngagai peranak ti begunaka bantu nya.