KUCHING: Perintah Sarawak ngungkupka belanja sepenyampau RM405 juta kena bejalaika Pakej Bantu Khas Sarawakku Sayang (BKSS) 5.0 kena mantu ngelempungka penanggul rayat maya ke betapi enggau pandemik COVID-19.
Kepala Menteri, Datuk Patinggi Abang Johari Tun Openg madah, BKSS 5.0 deka dipejalaika nengah 11 chara ti nyengkaum sekeda bantu ti sebedau tu dilanjarka kena ngurangka empas ari igi penyakit tu, pengelama enam bulan berengkah Januari 2021 ngagai Jun 2021.
Iya madah, nya mandangka Perintah Gabungan Parti Sarawak (GPS) seruran berunding sereta bejalaika chara ti pemadu engkeman kena mantu rayat kelebih agi maya menua betapi enggau pemar diatu.
"Perintah Nengeri Sarawak udah ngaga pemutus deka mantu rayat semua nengah sekeda chara ke pemadu beguna ti ulih ngelempungka penanggul rayat, kena neruska pengidup ninting hari.
"Perintah nengeri ngarapka Pakej BKSS 5.0 sepenyampau RM405 juta tu ulih mantu ngelempungka penanggul semua rayat Sarawak nyentuk ke bulan Jun 2021, lalu kitai mega ngarap sereta besampi ngambika enti vaksin udah bisi, lalu pengelekai COVID-19 ulih dikurangka pengudah Jun 2021," ku iya.
Abang Johari mantaika pekara nya ba Aum Pengarang Berita Bantu Khas Sarawakku Sayang (BKSS) 5.0 , ti diatur ba Wisma Bapa Malaysia ditu, kemari.
Dua ari chara ti dilanjarka iya nya diskaun bil elekterik enggau diskaun bil ai nyentuk bulan Jun 2021.
"Penguna domestik, komersial enggau industri deka diberi diskaun 5 peratus ngagai 25 peratus ba bil elekterik ninting bulan berengkah ari bulan Januari nyentuk Jun 2021, lalu diskaun tu meri penguntung ngagai 642,000 ruang bilik di serata Sarawak. Ungkus semua diskaun bil elekterik tu iya nya RM166.2 juta, ti ditanggung perintah GPS.
"Penguna domestik, komersial enggau industri deka diberi diskaun 10 peratus ngagai 25 peratus ba bil ai ninting bulan berengkah ari bulan Januari ngagai Jun 2021, lalu tu deka meri penguntung ngagai lebih ari 568,000 ruang bilik di serata Sarawak. Ungkus semua diskaun bil ai tu sepenyampau RM31.5 juta ti deka ditanggung perintah GPS," ku iya lebuh ti nyebut chara 1 enggau 2.
Abang Johari madah, diskaun 50 peratus suwa Skim Berumah HDC deka dipejalaika berengkah Januari ngagai Jun 2021, lalu chara tu deka meri penguntung ngagai lebih ari 3,200 penyuwa Skim Berumah HDC di serata Sarawak lalu ungkus semua diskaun dipelabaka lebih RM3.0 juta.
"Nya kebuah ba sekeda chara baka suwa, bil elekterik enggau bil ai ti diturunka tauka diberi diskaun nya deka ngurangka ungkus belanja orang ke bedagang lalu orang sesiku mega sama bulih, ari tu ulih ngelimat belanja (rayat)," ku iya lebuh ti nyaut tanya pengarang berita nengah aum Zoom.
Sama bisi ba aum pengarang berita nya kemari Sapit Kepala Menteri, Datuk Amar Douglas Uggah Embas, Tan Sri Datuk Amar James Jemut Masing enggau Datuk Amar Awang Tengah Ali Hassan sereta sida ke bukai.