KUCHING: Perintah Gabungan Parti Sarawak (GPS) nangkup ungkus belanja sepenyampau urung RM11.8 juta nengah pengawa meri diskaun 30 peratus chukai tanah ba taun 2021.
Kepala Menteri Datuk Patinggi Abang Johari Tun Openg madahka, diskaun nya dikena ngurangka penanggul rayat ti betapi enggau pemar tauka penusah ketegal pandemik COVID-19.
"Diskaun 30 peratus ungkup bayar chukai tanah ba taun 2021 ti deka meri penguntung ngagai lebih 52,400 alai endur diau, palan komersial enggau industri, kebun bedandang besai enggau perengkaguna mensia mayuh ke bukai.
"Chara tu deka ngurangka penanggul rayat enggau deka begunaka ungkus belanja sepenyampau RM11.8 juta ti dibayar perintah GPS," ku iya mantaika chara ke-8 dikena mantu rayat dalam Pakej BKSS 5.0.
Abang Johari madahka pekara nya ba Aum Pengarang Berita Pakej Bantu Khas Sarawakku Sayang (BKSS) 5.0 ti diatur ba Wisma Bapa Malaysia ditu, kemari.
Berebak enggau tu iya mega madah nengah pakej BKSS tu iya nya chara ke-10, bayar premium tanah mega ditangguhka dulu.
"Atur nangguhka bayar premium tanah sekali aja tauka 'one-off' ba taun 2021 deka meri penguntung ngagai lebih 1,720 pengempu tanah ba serata Sarawak ti nyengkaum tanah betanam betupi, alai diau, komersial enggau industri sereta institusyen perintah enggau peribit," ku iya.
Kelimpah ari nya, Abang Johari nerangka chara ke-10 dalam Pakej BKSS 5.0 iya nya nadai bayar lisin hotel enggau rumah ngenduh sementara.
Nitih ku iya, nadai mayar lisin hotel 'one-off' tauka sekali aja ngagai 17,300 bilik hotel ba serata Sarawak taun 2021.
"Tu deka meri penguntung ngagai lebih ari 340 pengemeran hotel enggau rumah ngenduh sementara.
"Iya deka begunaka ungkus belanja perintah GPS sepenyampau RM400,000," ku iya nerangka bantu ti diberi ngagai rayat nengeri tu nengah Pakej BKSS 5.0.
Nyempulang iya ba aum pengarang berita tiga iku sapit iya, Datuk Amar Douglas Uggah Mebas, Tan Sri Datuk Amar James Jemut Masing enggau Datuk Amar Awang Tengah Ali Hassan.