KUCHING: Apai indai nembiak sekula ti dirandau madahka belajar nengah chara 'online' enda tentu efektif taja pan sida nemu semina nya chara bala anak sida belajar diatu.
Kebuah pia, ba penemu sida ke diinterbiu madahka kelalu mayuh utai ngachau fokus sida belajar.
"Aku bisi siku anak ti nyendiaka diri ngambi peresa SPM lalu belajar enggau pengajar iya nengah chara online. Iya enda tentu ulih fokus belajar laban bala menyadi iya bemain dalam rumah lalu ngachau fokus iya belajar," ku Veronica Aju.
Ba penemu iya, manah agi bala nembiak belajar di sekula taja pan iya nemu gaya Covid-19 diatu ti ngujungka bala nembiak enda dikemendarka besekula.
Kelimpah ari nya, iya ngarapka bala nembiak sekula kelebih agi anak iya empu ti belajar di rumah, ulih nitihka chara belajar ke baru nya.
"Nyadi apai indai, aku nemu nya mar ba bala nembiak sekula kelebih agi maya pandemik Covid-19 tu, tang sida patut nemu ke alai sida nadai pilih bukai," ku iya.
Chimon Upon ke mega agi bisi anak besekula, sepenemu enggau Veronica, madahka anak iya pan pedis fokus belajar nengah chara kelas online.
Ku Chimon, bala nembiak sekula ti belajar nengah chara online tauka ngulu kelas online, pedis deka fokus kelebih agi maya sida ba rumah.
"Ba sekula bala nembiak ke belajar nya dijaga bala pengajar enggau manah , tang di rumah bala apai inda engka enda ulih nyaga baka nya.Bala anak nya engka limpang ngaga pengawa bukai sekumbang ke belajar ," Ku Chimon.
Kelimpah ari nya, Veronica enggau Chimon sepenemu madahka anak sida bisi penanggul belajar nengah online di rumah laban internet enda manah tauka kurang kereban ke nyaup sida belajar.
Nya alai ba runding seduai, belajar dalam kelas endang chara ke pemadu manah alai bala anak sida belajar.
Belajar nengah online nyadi 'norma' baru ungkup sekula enggau institusyen pelajar di serata dunya diatu ketegal pandemik Covid-19.
Nengah pengawa bejalaika prosedur operasyen standard ( SOP) enggau atur bejaga- jaga, mayuh bala nembiak diatu dikemendarka nurun besekula baru.
Taja pia, agi bisi sekula enggau institusyen pelajar mengkang ngena chara kelas online kena ngajar bala nembiak sida.