BINTULU: Kaunsil Sungai Sarawak (LSS) enggau ejensi ti bekaul sereta pengari komuniti ngatur pengawa ngelasi sungai kena nentuka nya likun ungkup peranak ba lima genturung pendiau di semanjai Sungai Balui iya nya Keboho, Naha Jalei, Naha Nyalong, Long Bulan enggau Long Jawe ti mungkur 220 pintu bilik berindik ari penanggul agang ti melepu ke nekul pejalai nengah sungai di kandang menua Belaga.
Menteri Perengka Pengangkut Sarawak Datuk Lee Kim Shin madah, ungkup tuju nya, LSS enggau ejensi ti bekaul deka bekerejasama enggau komuniti di kandang menua ti kena keruga nya enggau mantang paku besi lalu ditanchang ke tebing sungai ngena tali ngambika bisi jalai ti likun ungkup perau enggau bot di kandang menua nya.
Taja pia, ku iya, berindik ari pentin Atur Nagang Pemindah ungkup Bagi Menua Sibu ari 16 nyentuk 29 Januari 2021 lalu PKP Nitihka Penetap (PKPB) ungkup bagi menua bukai di nengeri tu berengkah 18 nyentuk 31 Januari 2021 nya alai aktiviti muka jalai sungai ti dilangkar nya ditangguhka nitih peminta Komiti Mutarka Penusah Ngenyit Nengeri Sarawak (JPBNS) ketegal COVID-19.
“Beserimbai enggu nya, LSS benung nyikap pekara ti beguna ngambika aktiviti nya ulih dipejalai enggau naka pengelengkas pengudah PKP sereta PKPB tu tembu,” ku iya madah dalam penerang media ditu kemari.
Berindik ari nya, ku iya, endang beguna meretika aktiviti muka sungai tauka ngelasi sungai ti dilangkar tu ke ngaul interaksyen sereta kontak ti rat entara pangan diri lalu tu enda dikemendar dalam pengeransing kitai nagang pengelekai COVID-19 di nengeri tu.
Ku iya madah, Opis menteri Pengangkut Sarawak udah ngatur pengawa berandau kena 18 Disember 2020 entara raban ti ngembuan tanggungpengawa ngambika nemu enggau silik agi bekaul penanggul agang ti melepu ba sungai di Belaga.
Ku iya, raban ti bekaul ke dikangau enggau baum iya nya pengari ari Opis Kampung Sarawak, LSS, Opis Pengeraja Asal enggau Rampa Menua (NREB), Sarawak Forestry Corporation (SFC), Opis Tanah enggau Survei Sarawak sereta Sarawak Energy Berhad (SEB).
“Semua kaban nya madahka tu ukai pekara baru. Sebedau tu, SEB nengah NREB udah nyiri kunteriktor di kandang menua nya ngambika muai ranggas kay kena nyendiaka jalai ti likun kena pemindah peranak di kandang menua nya,” ku iya.
Ku iya madah, tim tu ti betuaika LSS enggau pengari ari ejensi ti bekaul udah ngelawa palan di kandang menua nya kena 21 Disember 2020 kena meretika gaya ti nyadi dia lalu ari asil program ngelawa nya udah tetemuka nadai palan pengentap pendiau ti meruan ba atas kandang menua ti kena keruga ba Sungai Linau kelimpah ari sekeda jelatung ti agi dikena ba pelilih menua nya.
Nengah penerang Lee, bisi lima genturung pendiau di semanjai Saungai Balui ke alai jalai pemindah nengah sungai sida nya udah kena tekul ranggas kayu lalu perambu meresi nya digaga tim ti udah ngelawa palan nya ngambika ulih mutarka penanggul tu enggau lengkas.