KUCHING: Bagi Menua Kuching ti ngembuan pemesai tanah manggai 4,560 kilometer pesegi, tau dikesemaka besai agi ari tiga buah nengeri enti dipegulaika iya nya Perlis, Melaka enggau Pulau Pinang, tentu meri pemar enggau peluang ba pengawa ngemansangka kandang menua nya, ti mungkur semua.
Taja pia, berengkah ari Sarawak udah merdeka begulai enggau Sabah, Brunei enggau Singapura ti sama enggau numbuhka Perintah Besai Malaysia ba taun 1963, pemujur Sarawak nempuh semua pemar keterubah endar suba, udah meri pemaik ngagai Kuching, ti terus ngasaika pemansang nyentuk ke diatu.
Pengudah tusun atur pegai nengeri Sarawak dibagi ngagai 12 bagi menua dalam taun 2015, Bagi Menua Kuching diatu mungkur tiga pelilih menua iya nya Kuching, Bau enggau Lundu, ti sama ngerembai maju kenyau ari 20 taun ke udah dalam jeman milenium tu.
Jeman niti pemansang, iya nya maya ari baruh pegai Kepala Menteri keempat enggau ti pemadu lama megai Sarawak, Tun Abdul Taib Mahmud, ti udah ngangkatka tikas mengeri Kuching nyadi mengeri besai kena 8 Ogos 1988.
Taja pan pengudah Abdul Taib nyurutka diri kena 28 Feb 2014, Bagi Menua Kuching majak ngasaika pemansang nyadi ‘wilayah perintis Sarawak’ ari baruh pegai Tan Sri Adenan Satem (Niang dianugerahka Pehin Sri), sebedau disilih Datuk Patinggi Abang Johari Tun Openg.
Abang Johari yke mega Kaban Kunsil Nengeri Satok, sitak ba puak mengeri besai ti tebal agi diuan raban bansa Melayu.
Penyelai iya, taja pan Satok nengah transformasyen pemansang besai kenyau ari betaun-taun ke udah, tang Satok agi ulih ngenanka rampa genturung pendiau asal ba kandang menua nya.
Pematak ke pemadu baru di mengeri besai tu, iya nya jematan ikonik ti ditengah bedarat iya nya Jematan Darul Hana, ke beungkus RM35 juta digaga semak enggau Gabenor British ke penudi endar, Sir Alexander Waddle ke meraka Sungai Sarawak ari Astana Negeri ngagai tebing seberai, ba hari ke penudi endar Inggeris megai Sarawak.
Taja pan nya nyadi kelai ti pemadu baru, nemuai ti nemuai ngagai Darul Hana ulih ngenang baru nostalgia pengidup raban bansa kelia ba sepanjai Sungai Sarawak, lalu perintah nengeri mega meri komitmen deka ngenanka sekeda begunan ke popular bukai ti udah didirika lebih seabad di mengeri besai Kuching.
Projek Darul Hana tu sebagi ari mayuh bengkah inisiatif perintah nengeri, beserimbai enggau pengawa ngintu penumbuh mengeri Kuching ke-32, taun siti nyin tadi.
Ku Abang Johari, perambu timpuh panjai iya nya meri seput baru ngagai pemansang ba sekeda kandang endur di mengerii besai tu nyentuk taun 2025.
“Ke bendar iya, bisi mayuh kandang endur di Kuching ti ulih dikemansangka kitai baru tang enda ngeruga gaya tradisional. Kitai deka meri seput baru ngambika kitai bisi mengeri moden kelimpah ngenanka palan tradisional nya,” ku iya seraya madahka projek ngemaruka mengeri tu deka dipejalai bemalinka pelin besai timpuh panjai ti udah dilangkar.
Endang amat, pelilih menua Bau kelia tebilang enggau aktiviti ngelumbung emas, udah berengkah nyingkang sereta ngaul diri ba ekonomi baru, baka ti dipadahka Abang Johari apin lama ti udah ke alai pelilih Bau udah nemu ‘emas’ dalam gaya ke baru, ungkup rayat dia.
Pengandal nya dipandangka perintah nengeri ti udah ngungkupka RM164.8 juta dalam kandang empat taun ke udah, kena ngaga sekeda projek di Bau, sebuah pasar mit ti benung mansang, urung 33 km barat daya ke mengeri besai Kuching.
Kaban Kunsil Nengeri Tasik Biru, Datuk Henry Harry Jinep madahka ungkup belanja nya udah dipedua kena ngaga perengkaguna mensia mayuh, skim rumah ulih dibeli, paip ai beresi enggau skim elekterik menua pesisir nyengkaum kena ngemanahka jalai.
Ku iya, pemansang di Bau deka di pejalaika belama laban perintah nengeri udah bisi langkar atur pengawa kena nempa pemansang ungkup jemah ila nyentuk ke taun 2030, lalu kena nentuka pelilih menua nya sebaka enggau pelilih menua bukai ti maju di Sarawak.
“Rayat udah meda pemansang di Bau dalam timpuh empat taun lalu nya deka ditampung baru pengudah abis timpuh Atur Nagang Pemindah Bisi Penetap (PKPB),” ku iya.
Lundu, pelilih menua ti pemadu ke selatan di Sarawak, ngembuan mayuh peluang enggau akses ke muntang agi, enti pakej Telok Melano-Sematan ti beungkus RM580 juta sepenyauh 33.7km, projek Jalai Besai Pan Borneo ba taun 2019 udah tembu digaga, deka nyadi palan pematak temuai di nengeri tu.
Niang Adenan, ke mega ADUN Tanjung Datu kala meri jaku tundi dalam taun 2017, madahka sitak nya ke dalam pelilih Lundu, ‘serega’ ungkup orang ti rindu nginti.
Iya mega kala bejaku nundi maya nemuai ngagai pelilih menua nya suba ,madahka kandang ai di Lundu ngembuan mayuh ikan: ”Di sini (Lundu) ada terlalu banyak ikan sehingga dah tua baru mati,”.
Ke bendar, potensial pelilih Lundu nyadi siti ari palan pematak temuai di Sarawak diaku Kepala Menteri lebuh mantaika pelin besai pemansang ungkup pemansang dagang temuai.
“Enggau pemisi infrastruktur tu, sektor peribit ulih sama enggau dalam aktiviti beranakka puku sereta ngelakuka palan ke manah nya nggai serata dunya.
“Ditu, kami bisi Taman Negara enggau pantai ti manah dipeda mata sereta tau digaga nyadi palan pematak temuai,” tambah Abang Johari. — Bernama