SIBU: Perintah Sarawak nyadung bantu pemakai ngagai 73,000 Ketua Ruang Bilik (KIR) ti napi pemar di Bagi Menua Sibu berindik ari pengawa bejalaika Atur Nagang Pemindah (PKP).
PKP Bagi Menua Sibu berengkah dipejalaika ari16 nyentuk 29 Januari tu mungkur pelilih menua Sibu, Selangau enggau Kanowit.
Semua KIR penerima iya peranak ti napi pemar ari 11 sitak Kunsil Nengeri (DUN) dalam tiga pelilih menua nya.
Kepala Menteri, Datuk Patinggi Abang Johari Tun Openg udah bejadika kelai pengawa nyuaka bantu nya ba Galeri Kompleks Islam Sarawak ditu, kemari.
Sapit Kepala Menteri, Datuk Amar Awang Tengah Ali Hasan madah, bantu nya mungkur ungkup belanja RM5.1 juta, deka disadung enggau naka pengelengkas seraya nitihka prosedur operasyen standard (SOP) PKP ti terit.
“Berindik ari pengawa bejalaika PKP di Bagi Menua Sibu, Perintah Nengeri nengah komiti mit udah baum kena 18 tu tadi lalu ngelangkar strategi kena ngatur pengawa nyadung pemakai ngagai peranak ti napi pemar ketegal pengawa bejalaika PKP.
“Ba renggat bagi menua, Komiti Mutarka Penusah Ngenyit Bagi Menua (JPBB) Sibu deka bekerejasama enggau bala pemesai pelilih menua, ketua raban bansa, ketuai bansa, kapitan, JKKK enggau gerempung ukai dikuasa perintah (NGO), ngelala KIR ti begunaka bantu pemakai.
“Ungkup belanja kena meli barang pemakai nya deka diberi ngagai JPBB Sibu ngambika sida tau nyadung pemakai seraya dibantu JPBD Pelilih Sibu, Selangau enggau Kanowit,”ku iya ba aum media pengudah bejadi nya.
Awang Tengah ke mega Menteri Pemansang Mengeri enggau Pengeraja Asal Kedua madah, Opis Menteri Pengelantang Pendiau Komuniti, Orang Indu, Ruang Bilik enggau Pemansang Anak Mit (KWKPK) nengah Opis pengelantang Pendiau Sarawak (JKMS) benung nyadung pemakai enggau ke utai bukai ke diguna baka tusu, pampers, modes ngagai urung 700 ruang bilik ti mungkur 3,800 iku ba 32 rumah panjai.
“Kelimpah ari nya, pemakai ti disumai mega disadung ngagai 52 iku pengereja pengawa terabai menua ba siti palan kuarantin enggau 46 iku pengereja pengawa terabai menua ke gawa nyaga sereta ngempang jalai alun ba empat endur,” ku iya ke mega Menteri Dagang Antarabansa enggau Industri, Terminal Industri enggau Pemansang Orang Dagang.
Sama bisi datai maya nya, Menteri Muda Pengerai Mensia Mayuh Dr Annuar Rapaee, Kaban Kunsil Nengeri Daro Safiee Ahmad, Kaban Dewan Negara Senator Robert Lau Hui Yew, Residen Bagi Menua Sibu Charles Siaw, Pemesai Pelilih Menua Sibu Suhaili Mohamed, Temenggung Datuk Vincent Lau enggau Temenggung Datuk Wan Hamid Edruce.