Anda di sini

203 kes baru positif COVID-19, rikod ninting hari ti pemadu mayuh

Advertisement

KUCHING: Bisi 203 kes baru positif COVID-19 ditemu di Sarawak kemari lalu tu rikod ninting hari ti pemadu tinggi, kala dirikodka kenyau ari pandemik tu nyadi ba nengeri tu.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah enggau penambah kes baru nya nyadika penyampau semua kes positif COVID-19 ba Sarawak naka kemari bisi nambah nyadi 2,570 kes.

“Sehari tu, bisi 203 kes baru positif COVID-19 ti ditemu di Sarawak ti diripotka nyengkaum ba pelilih menua Sibu ngerikod 120 kes; Kanowit (43); Kuching (12); Betong (8); Bintulu (5); Samarahan (5); Miri (4); Dalat (3); Kapit (1); Pakan (1) enggau Serian (1).

“Ari 120 kes baru ti ditemu ba Pelilih Menua Sibu nyengkaum 78 kes bekaul enggau Kluster Pasai (rampit dalam pelilih menua); 40 kes beperesa COVID-19 bekaul individu ti beperesa ba palan pengerai di pelilih menua Sibu enggau dua kes asil ari meresa individu ti pulai ari kandang endur berisiko rampit COVID-19, iya nya ari Selangor enggau Labuan.

“Nambahka nya, kes baru ti ditemu bekaul enggau Kluster Pasai  nyengkaum ba Pelilih Menua Kanowit bisi 43 kes; Pelilih Menua Betong (8 kes); Pelilih Menua Dalat (3 kes); Pelilih Menua Kapit (1 kes) sereta dikategori nyadi kes Import C ari pelilih menua Sibu,” ku JPBNS, kemari.

Dua belas kes baru ba Pelilih Menua Kuching nyengkaum dua kes bekaul enggau Kluster Pasai (kategori kes Import C ari Pelilih Menua Sibu) enggau 10 kes diperesa laban bisi kontak ngagai kes positif COVID-19 sereta dikategori kes rampit dalm pelilih menua tu.

Ba Pelilih Menua Bintulu ti bisi lima kes nyengkaum empat kes bekaul enggau Kluster Pasai enggau siti kes ti diperesa laban bisi kelai dirampit COVID-19 sereta dikategori kes rampit dalam pelilih menua tu.

Bisi lima kes ditemu ba Pelilih Menua Samarahan kemari  iya nya pengudah diperesa laban bisi kontak ngagai kes positif COVID-19, ti nyengkaum siti kes dikategori rampit dalam pelilih menua tu enggau 4 kes dikategori kes Import C ari pelilih menua Kuching.

“Empat kes ba pelilih menua Miri ti nyengkaum dua kes bekaul enggau Kluster Jelita enggau dua kes diperesa laban bisi kelai dirampit COVID-19. Kes dikategori nyadi kes rampit dalam pelilih menua tu.

“Pelilih Menua Pakan enggau Pelilih Menua Serian ti sama ngerikodka siti kes baru iya nya ti diperesa laban bisi kelai dirampit COVID-19. Kes dikategori nyadi kes rampit dalam pelilih menua tu,” ku JPBNS.

JPBNS madah, berindik ari penambah kes rampit dalam pelilih menua tu sekeda pelilih menua betukar status ngagai Kuning tauka Oren, kelimpah ari naka kemari bisi 15 pelilih menua agi bestatus Gadung.

Pelilih Menua Sebauh mega agi bestatus oren ti bisi 27 kes berampit dalam pelilih menua tu dirikodka., kelimpah ari Pelilih Menua Subis, Belaga, Betong, Meradong, Julau, Kapit, Simunjan, Asajaya, Selangau, Sebauh, Samarahan, Sri Aman, Bukit Mabong, Bintulu enggau Limbang agi status Kuning enggau penyampau semua 77 kes berampit dalam pelilih menua tu ti diripotka dalam timpuh 14 hari ke udah.

Pelilih Menua Kuching, Sibu, Miri enggau Beluru agi bestatus Mirah enggau penyampau semua bisi 1,035 kes berampit dalam pelilih menua tu diripotka ba empat pelilih menua tu dalam timpuh 14 hari ke udah.

“Sehari tu (kemari, Pelilih Menua Kanowit udah betukar status ari Oren ngagai status Mirah pengudah sepenyampau 73 kes berampit dalam pelilih menua tu ditemu dalam timpuh 14 hari ke udah.

“Pelilih Menua Dalat udah betukar status ari Kuning ngagai Oren enggau penyampau 22 kes berampit dalam pelilih menua tu bisi dirikotka.

“Pelilih Menua Serian enggau Pakan mega udah betukar ari status Gadung ngagai status Kuning pengudah dua pelilih menua nya sama ngerikodka siti kes berampit dalam pelilih menua tu ditemu baru dalam timpuh 14 hari ke udah,” ku JPBNS.

Advertisement