KUCHING: Perintah nengeri ngemendarka belanja sepenyampau RM81 juta ungkup operasyen Komiti Mutarka Penusah Ngenyit Nengeri Sarawak (JPBNS) dalam timpuh bulan Januari ngagai Jun taun tu.
Sapit Kepala Menteri Datuk Amar Douglas Uggah madahka pekara nya dikemendarka YAB Kepala Menteri Datuk Patinggi Abang Johari Tun Openg, ke alai belanja nya ari duit perintah nengeri.
Iya madahka ungkup belanja nya nyengkaum ungkus belanja dikena numbuhka makmal PCR di Kapit, bepelasarka peminta ari Opis Pengeri Bagi Menua Kapit.
“Sehari tu (kemari) YAB Kepala Menteri udah ngemendarka ungkp belanja dikena bejalaika operasyen tauka ngaduka pengawa JPBNS berengkah ari bulan Januari ngagai Jun ti sepenyampau RM81 juta.
“Penyampau tu (RM81 juta) nyengkaum ungkus dikena kitai numbuhka PCR Lab di Kapit. Ensanus Opis Pengerai Bagi Menua Kapit minta makmal tu ditumbuhka di Kapit laban bisi beberapa kes sampel diambi di Kapit laban begunaka timpuh ti panjai baru nemu pemutus, nya kebuah sida minta numbuhka makmal baka ti ditumbuhka ba Limbang.
“YAB Kepala Menteri udah ngemendarka nya ngena duit nengeri Sarawak ngambika Kapit bisi PCR Lab,” ku iya.
Uggah ti mega chairman Komiti Mutarka Penusah Ngenyit Nengeri Sarawak (JPBNS) madahka pekara nya nyerumba aum pengarang berita COVID-19 Sarawak ti diatur ba Begunan DUN Lama ditu, kemari.
“Ensanus aku madah bakani Perintah Nengeri Sarawak chukup bebendar deka nyendiaka duit tauka belanja, sehari tu nyadi nyata iya nya YAB udah nyendiaka RM81 juta ungkup ngaduka pengawa JPBNS ari bulan Januari ngagai Jun,” ku iya nandu.
Iya madahka perintah nengeri chukup bebendar deka meri servis ti pemadu engkeman nengah pengawa nyendiaka perengkaguna kuarantin, hotel endur kuarantin, numbuhka PCR Lab enggau ke bukai.
“Kena kitai ngelaban COVID-19 tu aku sekali agi minta rayat beserakup sereta bekerejasama laban enti semina ngarapka ungkup belanja enda chukup, ngambika kitai menang kitai begunaka kerejama semua laban tu ke pemanah semua kitai.
“Enti sebedau tu kitai ulih, udah tu mega kitai ulih ngelaban enggau saup sereta bekerejasama ari semua,” ku iya.
Kelimpah ari nya, Direktor Opis Pengerai Nengeri Sarawak Dr Chin Zin Hing ba aum pengarang berita ti sama ngenang bekaul enggau kapasiti katil COVID-19 di Sibu berindik ari pemayuh berampit di menua tu.
“Kapasiti katil COVID-19 di Sibu 79 peratus.
“Diatu kitai bisi empat Palan Kuarantinenggau Perubat Kes Mimit Risiko (PKRC) nyengkaum ba Methodist Centenntial ulih endur 94 buah katil ti beoperasyen lemai tu (kemari); Kem Kemuyang (123 katil); Institut Latih Pengerai Malaysia, Sibu (94 katil) enggau ba Hotel Desa Sanyan ti ulih endur 800 katil ke tau dikena seminggu ari diatu,” ku iya.
Dr Chin arap bendar enggau kapasiti nya sereta penyampau kes ke udah gerai sereta dikemendarka pansut ari palan kuarantin nya, opis pengerai nengah Sepital Sibu ulih nyendia enggau ngubat pesakit COVID-19 ngena kereban ke bisi.
Nambahka nya bekaul enggau palan beperesa COVID-19 di Sibu, iya madahka, sekeda sampel di Sibu deka dianjung ke Sepital Besai Sarawak, BMC enggau UNIMAS.
“Sehari tu (kemari) bisi 1,500 sampel udah dianjung ke Kuala Lumpur. Lalu enggau chara ti baka tu, Opis Pengerai Nengeri Sarawak arap bendar maya nganti pemutus nya ulih dikurangka entara 24 ngagai 36 jam,” ku iya.
Nitihku iya mega, pengulih kereban kena meresa sampel ti mayuh di Sibu iya nya ulih meresa 4,750 ti nyengkaum 3,500 ba sepital perintah, lalu ba UNIMAS (500), BMC (500) enggau Gribble mega 500.