SIBU: Jaku tangkan enda ngasuh mindah ari rumah sekumbang Atur Nagang Pemindah (PKP) dipejalaika di Sibu nyata enda dikeibuhka laban agi mayuh ngelaban atur nya, pia ku Chairman Majlis Perbandaran Sibu Clarence Ting Ing Horh, kemari.
Ku iya, bisi sekeda mensia mayuh ditu madahka pengaji sida mejal sida nurun kereja taja pan nemu pekara nya beguna amat kena nentuka graf COVID-19 di bagi nya dilandaika.
Ku Ting, tumu pagi iya nerima mesej ari mensia mayuh ti madahka diri berasai enda puas ati laban kompeni besai ngelanggar PKP seraya nanya sekalika kedai perabot, aksesori kerita enggau servis dispenser ai tau beroperasyen dalam timpuh tu.
“Ke pemadu ngasuh aku enda nyamai ati iya mesej ari melaki bini, staf ti enggau nurun kereja madah ngagai aku, sida dipejal bos sida nurun gawa. Nya sebana minta bantu, sida berasai mar amat maya PKP,” ku iya dalam siti utai tulis iya ba Facebook.
Siti agi aduan ke diterima ari orang ke kereja ba pak kopi ti madahka pengempu kedai nya agi ngemendarka orang ke suah datai makai ngirup kia, makai ba premis nya, taja pia orang ke besebana nya enggai madahka ali kedai nya laban nangika diri dikemaduka kereja.
Ku Ting, lebuh iya bejalai ngelingi mengeri nya kena nentuka pengamat pekara nya, iya beratika agi mayuh kerita diengkah ba kandang palan di komersial di mengeri nya.
“Au, bisi mayuh sebana ari mensia mayuh ti meda agi mayuh orang nurun kereja kelebih agi ba opis” ku iya.
Taja pia, iya madahka gaya nya bebida enggau bak maya hari belelak laban lebuh ke bejalai nya ngelama tu kisuk, tang tu enda.
Ting ngarap pengelekai penyakit nya ulih di ketuka enggau lengkas ngambika rayat ulih idup baka selama.
Sibu ngerikod pemati keterubah COVID-19 kemari, iya nya siku lelaki ke beumur 55 taun ari Kanowit ti dikaitka enggau Kluster Pasai ti naka ke diatu udah ngujungka 664 kes positif. — Bernama