Anda di sini

Peranak ba tiga alai neritka PKP deka nerima bantu ‘bakul pemakai’

Advertisement
AWANG TENGAH
AWANG TENGAH

KUCHING: Perintah Nengeri Sarawak deka meri bantu ‘bakul pemakai’ 73,000 iti ngagai ruang bilik ke napi penusah di Sibu, Selangau enggau Kanowit berindik ari pengawa neritka Atur Nagang Pemindah (PKP) ari 16 nyentuk 29 Januari tu.

Tiga kandang menua nya alai neritka PKP berindik ari penambah kes COVID-19 ti ngerampit dalam kandang menua nya ari Kluster Pasai ti ditukuka kena 9 Januari tu  tadi.

Sapit Kepala Menteri Sarawak Datuk Amar Awang Tengah Ali Hasan madah, bantu bakul pemakai nya deka disadung Komiti Mutarka Penusah Ngenyit Nengeri (JPBN) Bagi Menua Sibu enggau chara berenggat berengkah ari sehari tu.

“Kami (perintah) deka nentuka semua orang ti tusah nerima bantu pemakai nya. Nya alai, kerejasama semua baka ari bala Ketuai Raban Bansa, JKKK (Komiti Pemansang enggau Pengelikun Genturung Pendiau) sereta gerempung ukai dikuasa perintah (NGO), dipinta meri penerang ke betul ngambika orang ke endang amat begunaka bantu enda teberayan,” ku iya.

Menteri Pemansang Mengeri enggau Pengeraja Asal II Sarawak nya madah munyi nya pengudah nyadi chairman aum bekaul rentayan pemakai di Wisma Sumber Alam ditu, ensanus.

Ku iya, pengawa nyadung nya deka dikelengkaska ngena perengka pengangkut langit kelimpah perengka pengangkut darat enggau ai, nitihka gaya rampa menua ba kandang menua nya.  

Bela bisi enggau nyadung bantu nya, Opis Bomba enggau Penyelamat Malaysia, Angkatan Pertahanan Awam, Raban Soldadu Malaysia, Opis Menteri Dagang Dalam Nengeri enggau Pekara Penguna, ketuai raban bansa enggau ejensi ke bekaul. — Bernama

Advertisement