KUCHING: Orang ke nginjau duit ari Perbadanan Tabung Pendidikan Tinggi Nasional (PTPTN) muji pengibuh enggau nyambut manah pemutus perintah bekaul enggau nangguh mayar pulai duit injau Perbadanan Tabung Pendidikan Tinggi Nasional (PTPTN) ti dibantaika Menteri Besai (PM).
Caroline Shamby Charles Egat, 31, bepenemu pekara ti dibantaika PM Tan Sri Muhyiddin Yassin nya abis nadai ngurang penanggul belanja mensia mayuh nyengkaum penginjau PTPTN ti tekeruga ketegal COVID-19 enggau tasah ampuh bah.
“Ba penemu aku pekara ti dibantaika (PM) tu amat manah sereta chukup mantu baka kami ke nyadi nginjau duit ari PTPTN, abis nadai ngurangka penanggul belanja laban mayuh ti tekeruga ba penatai pemisi ketegal COVID-19 enggau tasah ampuh bah.
“Dalam timpuh ke sama aku chukup gaga ati sereta meri terima kasih ngagai pengibuh perintah maya ke betapi enggau penyadi pandemik tu. Pekara ke dibantaika (PM) nya bisi mega ngelantang ati, terima kasih perintah,” ku Caroline madah ngagai Utusan Borneo, kemari.
Nambahka nya Rosnah Janie, 27, mega madah pengaga ari diri sereta beterima kasih ke pengibuh perintah ti udah ngaga pemutus bekaul enggau moratorium ungkup penginjau PTPTN.
Iya bepenemu, moratorium nya udah tentu ulih ngurangka penanggul belanja penginjau PTPTN seraya ulih meri awak ngagai penginjau ngatur belanja manah agi maya benung betapi enggau gaya ekonomi ti tekeruga ketegal COVID-19 lebih agi.
“Aku berasai gaga ati ninga berita ti dibantaika PM sereta beterima kasih ke pengibuh perintah laban atur ti baka nya ulih ngurangka penanggul belanja dalam timpuh ke diatu.
“Berebak enggau tu bala penginjau PTPTN udah tentu mega ulih ngatur belanja enggau manah agi laban dalam timpuh diatu begunaka kitai landik bejimat ba belanja,” ku iya ti mega siku ari penginjau PTPTN.
Kelimpah ari nya, Sofia Lita, 28, mega madah diri setuju enggau moratorium PTPTN nyentuk 31 Mac 2021.
Kebuah pia ku iya, taja pan bekereja sereta begaji tang ketegal penyadi pandemik COVID-19 bisi ngeruga penatai pemisi ba senentang gaji.
“Aku pechaya mayuh ekonomi kompeni ti enda tegap ketegal COVID-19, ti ngujungka mega ngeruga gaji kelebih agi baka kami ti nyadi penginjau PTPTN maya deka bejalaika tanggungpengawa mayar pulai duit injau nya.
“Lalu enggau pemutus deka meri moratorium ngagai penginjau PTPTN baka ti dipadah Menteri Besai, nya berita ke chukup meri pengaga laban nya ulih ngelempungka penanggul belanja ti ditapi maya pandemik COVID-19 diatu,” ku iya.
Ensanus, Menteri Besai (PM)Tan Sri Muhyiddin Yassin bisi madah moratorium mayar pulai duit injau Perbadanan Tabung Pendidikan Tinggi Nasional (PTPTN) dipejalaika pengelama tiga bulan.
Iya madah, moratorium nya upih dipinta penginjau PTPTN ti tekeruga ketegal pengelekai COVID-19 enggau penusah ampuh bah.
“Ngagai bala penginjau PTPTN ti tekeruga ketegal igi penyakit COVID-19 enggau tasah ampuh bah, sida tau minta moratorium mayar pulai duit injau PTPTN pengelama tiga bulan.
“Peminta nangguhka dulu tau digaga nyentuk 31 Mac 2021,” ku iya maya mantaika khas Pakej Bantuan Perlindungan Ekonomi dan Rakyat Malaysia (PERMAI) ti ditaburka terus nengah televisyen, ensanus.