MIRI: Orang dagang mikro kelebih agi ti bekaul enggau pengawa nyendiaka pemakai enggau nyual semua bansa pemakai, pemadu balat napi pemar sekumbang pandemik COVID-19 ke nyadi diatu.
Orang ke bejual ba premis nyual pemakai ditu mega ngaku, pengelekai enggau penyampau kes COVID-19 ti majak nambah udah meri empas ngenyit ngagai orang ke baru deka ‘enseput’ pengudah ke napi pemar kenyau ari bulan Mac taun nyin tadi.
Siku orang nyual pemakai ba Taman Tunku, Ugik Jalit madahka sekumbang timpuh Atur Nagang Pemindah (PKP) kenyau ari bulan Mac 2020, ditangkanka enggau Atur Nagang Pemindah Bisi Penetap (PKPB) enggau Mulaika Pemanah (PKPP), lalu diatu pulai baru ngagai PKPB pengudah kes nambah, ukai semina ngeruga dagang tang enggai enda pan ngasuh pekereja sida ngetu gawa.
“Ba orang ke ngempu dagang entara objektif ke mesti dijapai dalam timpuh hibernisasi iya nya nentuka status dagang ulih ditan taja pan operasyen sida tekeruga.
“Pemar besai kami iya nya mesti mayar utang ngagai pemekal dan enggau premis sereta nguji ngenaka pekerejataja pan kekadang nya mar amat,” ku iya madah ngagai Utusan Borneo ditu ensana.
Orang dagang mega betapi enggau pemar ngenanka pekereja laban nemu sida deka nempuh pemar ba pengidup enti sida diketuka.
“Taja pan bisi bantu ari perintah tang kami mesti ngiga chara bukai kena ngelamun pengurang penatai pemisi enggau pengerugi.
“Nya alai, aku semampai besampi ngambika pandemik COVID-19 ulih dipunaska jampat,” ku iya.
Siku agi orang ti bejual pemakai di Taman Tunku, Veronica Ubong Agan setuju engga penemu Ugik sereta ngarapka mayuh agi bantua diberi ngagai orang dagang mikro ke napi pemar baka sida.
Iya mega madahka diri irau ati nyema gaya ke diatu panjai nyadi, laban ukai semina utai ke dijual ba kedai sida aja bisi kurang orang meli tang servis katering bela baka nya.
Sebedau tu, mayuh pinta ti ngasuh seduai nyendiaka katering ba pengerami nikah, betunang, hari pengada, aktiviti gerija enggau ke bukai.
Taja pia, sekumbang maya pandemik COVID-19 enggau nitihka prosedur operasyen standard (SOP) ditetapka, pinta ba servis katering ngenyit kurang sereta mayuh rugi.
“Ti balat ngirauka ati kami laban pekara tu udah berengkah pun taun, lalu aku besampi ngambika pandemik ulih dipunaska jampat.
“Berebak enggau nya, aku mega ngarapka agi bisi ‘geran khas prihatin’ ke beungkus RM3,000 diberi ngagai orang dagang mikro baka kami,” ku iya.
Baka Ugik, Veronica ngarapka pengempu premis meretika gaya ke diatu sereta enda nikika rega suwa nyengkaum ngeletakka chaj laun mayar suwa.
“Nya alai, aku mega amat ngarapka semua rayat kelebih agi di kawasan Miri sngambika seruran bekerejasama nagang pengelekai COVID-19 ini. #Kita Jaga Kita,” ku iya.