MIRI: Perintah nengeri patut neritka atur ngagai individu ti ngelaban sereta enda nitihka atur ti ditetapka Komiti Mutarka Penusah Ngenyit Nengeri (JPBN) Sarawak sekumbang bejalaika atur Nagang Pemindah Bisi Penetap (PKPB) di serata nengeri.
Serakup Pemikir Dayak Sarawak (DTTAS) nyambut nyambut manah sereta nyukung pemutus JPBN Sarawak bejalaika PKPB di semua bagi menua di nengeri tu (kelimpah Sibu) berengkah ari18 Januari nyentuk 31 Januari tu, seraya madahka atur ti terit nya endang patut, kena nagang pandemik COVID-19, ti nyauka ngelemika menua.
Nya mega lalu nambahka penyampau orang ke dirampit penyakit nya di Sarawak, kelebih agi di Sibu ti diteritka Atur Nagang Pemindah (PKP) berengkah ari 16 nyentuk 29 Januari, ti ngujungka tiga bagi menua (Sibu, Kuching enggau Miri) dalam zon mirah.
“DTTAS ngansak atur ke terit agi dipejalaika opis bekuasa ngagai individu ke agi ngelaban sereta enda nitihka atur ti ditetapka sekumbang timpuh PKPB,” pia ku penerang begulai ari Mandal Presiden II DTTAS, Diana David Itang enggau Ketuai Komiti Mit Pekara, Seni enggau Main Asal DTTAS, Malvina Albert Klinsing, ditu, ensanus.
“Balat ngasaka ati laban agi orang enda beratka isu COVID-19 ini.
“Ba maya napi pemar ketegal virus COVID-19, kami ngansak ngambika semua orang meri kerejasama enggau sukung penuh ngagai raban Opis Menteri Pengerai Malaysia,” ku Diana.
Ku iya, DTTAS mega bela mai rayat nengeri tu ngambika sama besampika raban terabai menua awakka majak liat ati sereta kering bejalaika pengawa mutarka pengelekai COVID-19.
“Diatu, semua orang patut seati napi semua penekul sereta nyeliahka agenda tauka pekarake politik ti pulaika pemaik diri empu, ke pengelantang rayat seliahka ari nuduh pangan diri nyengkaum bepolitikka pengawa mutarka penyakit tu,” tambah iya.
Berebak enggau nya, Malvina dalam penerang begulai nya madah, DTTAS mega gaga amat ati sereta muji penyiru perintah nengeri tu nengah JPBN Sarawak enggau Opis Pelajar Negeri Sarawak, ti udah ngaga pemutus ke alai sesi besekula di nengeri tu ti ditetapka berengkah kena 20 Januari, dipejalaika ngena chara Ngajar enggau Belajar di Rumah (PdPR).
“Pemutus JPBN Sarawak enggau Opis Pelajar nya meri penyamai ati ngagaiapai indai enggau pengajar, ti irauka pengelikun bala nembiak maya ke besekula sekumbang timpuh PKPB enggau PKP ti dipejalaika nya.
“DTTAS nyambut manah pengawa nya lalu minta bala kaban enggau apai indai kelebih agi di nengeri tu, meri kerejasama ke pemadu manah ngagai bala pengajar sereta mantu ba chara PdPR tu,ngambi ulih dipejalaika enggau manah lalu nentuka pelajar bala anak majak dikemeratka,” ku iya.
Sesi besekula betemu mua semina mungjur nembiam ti ngambu peresa baka SPM, STPM, SVM, SKM, SKAM enggau DVM ungkup taun 2020 enggau 2021.
Nyadi sebuah gerempung ukai dikuasa perintah (NGO) ti amat beratka pelajar di nengeri Sarawak kelebih agi ba raban bansa Dayak, DTTAS mega ngarapka perintah jampat agi nyeruri pengelemi ba bungkur enggau akses internet di nengeri tu, kelebih agi di menua pesisir, ngambika pengawa ngajaran enggau belajar di rumah nengah chara ‘online’ ulih dipejalaika enggau mujur.
Ku Malvina baru, semua orang patut ngambi utai ke nyadi tu nyadika ajar, kasika mih jaku tesau enggau atur (SOP) ti udah ditetapka, ngambika pandemik ti nuntung menua tu ulih dipunaska enggau lengkas.
“Ketuka mih rentayan pengelekai COVID-19, seraka sosial sereta anag mindah ari rumah sereta kasika semua jaku tesau ti ditetapka nitihka SOP sekumbang PKPB di serata nengeri enggau PKP di bagi Sibu,” ku iya.