KUCHING: Sapit Kepala Menteri Datuk Amar Douglas Uggah Embas madahka iya endang puas ati enggau tikas ngasika Prosedur Operasyen Standard (SOP) kena nagang pengelekai pandemik COVID-19 dalam komuniti ditu.
“Kitai ulih meda nyauka 100 peratus ngasika SOP baka ngena sengkabung idung enggau mulut, seraka fizikal sereta ngerejister diri tama ngagai premis dagang sereta beperesa tikas pengangat tubuh sida ke datai kitu.
“Tu endang ulah ti positif lalu berita ti pemadu manah ungkup Sarawak...Rayat ngasika SOP (ti ditetapka). Enggau jaku bukai, sdia meri kerejasama penuh ngagai pengawa kitai ngelaban pandemik (COVID-19),” ku iya.
Iya madah munyi nya pengudah meresa ngenyit ba Pasar Komuniti Stutong enggau Pasar Kota Sentosa ditu, kemari.
Program ngelawa iya ba kededua palan nya kena nentuka tikas ngasika SOP ti dipadahka dalam pengawa nagang pengelekai pandemik COVID-19 di nengeri tu.
Uggah ke mega Chairman Komiti Mutarka Penusah Ngenyit Nengeri Sarawak (JPBNS) madahka iya endang andalka pengeransing tetiap raban lalu ngarapka semua pasar komuniti enggau palan bebelika barang ke bukai di nengeri tu ngembuan tikas ngasika SOP ti sama.
Iya mega muji sereta beterima kasih ngagai pemesai peneritadat raban bekuasa kandang menua (PBT) ti udah bejalaika pengawa sida nentuka mensia mayuh ngasika tetiap SOP ti diteritka.
“Terima kasih ba pengawa kita semua ti enda ngelala pengelelak.
“Aku nemu, bisi maya nya pengawa ti digaga nya napi pemar, pia mega maya ti ngabas ngenyit tu, aku beratika siku dua ti enda ngena tauka enda ingat ngena sengkabung idung enggau mulut.
“Taja pia, sama mih besaup ngerara sida enggau manah, ngelalau sida, lalu padahka batang tuju SOP tu iya nya nyaga sida sereta ruang bilik,” ku iya.
Ku Uggah nambah, “Sekali agi ungkup raban JPBNS aku endang beterima kasih lalu chukup andalka pengawa raban pekereja rintai mua, mensia mayuh sereta semua pemesai perintah ti bekaul”.
Program ngelawa Uggah ke Pasar Komuniti Stutong sama disempulang Dauk Bandar Opis Kaunsil Mengeri Kuching Selatan (MBKS) Datuk Wee Hong Seng.