KUCHING: Kerejasama entara komuniti enggau raban pekereja rintai mua endang diguna kena nagang pengelekai igi penyakit COVID-19 di nengeri tu.
Menteri Pengelantang Pendiau, Pengelantang Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madahka gaya pengelekai COVID-19 dalam menua majak nyadi kenyau ari Mac 2020.
Pia mega di Sarawak ku iya, tiga zon iya nya Kuching, Sibu enggau Miri diatu ba status Mirah lalu Sibu benung bejalaika pentin Atur Nagang Pemindah (PKP) berengkah 16 nyentuk 29 Januari 2021.
“Sarawak diatu ba tengah entara Semenanjung Malaysia, Kalimantan Indonesia enggau Sabah ke alai ketetiga nya ngerikodka kes COVID-19 ti tinggi.
“Nya alai kitai mesti bejejaga ngambika kitai ulih nagang pengelekai kes COVID-19 tu ari ti terus ngelekai di nengeri kitai,” ku iya.
Iya madah munyi nya lebuh ti bejaku ba Program Begulai enggau Bala Pekereja Rintai Mua Pengelantang Pendiau Bagi Menua Kuching ari McDonald’s Malaysia begulai enggau Gerempung Pengelantang Pendiau Ronald McDonald’s Malaysia ba Majma Mall ditu kemari.
Ku Fatimah nambah, kena nagang pengelekai igi penyakit tu, perintah nengeri nengah Komiti Mutarka Penusah Ngenyit Nengeri Sarawak (JPBNS) udah sedia enggau sekeda chara kena bejejaga.
Entara nya bejalaika pegnawa nyidi kes aktif (ACD) ti dipejalai enggau chakah ngagai kontak semak kes positif COVID-19 ungkup tuju ngasuh sida beperesa.
“Ke pemadu dikemerat, tentuka kita ngasika Prosedur Operasyen Standard (SOP) enggau ngemeranka seraka fizikal, ngena sengkabung idung enggau mulut sereta ke bukai,” ku iya.
Bejaku bekaul program nya, Fatimah madahka iya beterima kasih ngagai McDonald’s laban ti udah meri bantu ngagai bala pekereja rintai mua.
Iya ngarapka mayuh agi raban tauka individu datai meri bantu ngagai bala pekereja rintai mua COVID-19 nyengkaum ke bejalaika tanggungpengawa maya penusah ngenyit ampuh bah.
Sama bisi datai Sekretari Mendam Opis Menteri Pengelantang Pendiau, Pengelantang Komuniti, Orang Indu, Ruang Bilik enggau Pemansang Nembiak Mit Dr Rashidah Bolhassan, Pemesai Opis Pengelantang Pendiau Bagi Menua Kuching Norhayati Abdul Rahman, Menijer Restoran McDonald’s Pampang Metrocity Agnes Panti Augustine sereta bala bukai.