KUCHING: Opis Bomba enggau Penyelamat Malaysia (JBPM) Sarawak semina deka mantu meresika kandang endur ti jai tauka kamah ketegal ampuh bah ungkup palan pengentap pendiau orang lunggar umur aja.
Direktor (JBPM) Sarawak Khirudin Drahman madah munyi nya laban raban sida enda ulih nangkup peminta ari orang mayuh ti mnta rumah sida diperesika pengudah sida dituntung penusah ampuh bah.
“Peminta orang siku-siku enda ulih ditunda laban ti mekuh ngagai kandang endur mensia mayuh ti begunaka nya agi.
“Kitai semina meresika rumah kediri ti endur orang lunggar umur diau laban tusah ungkup sida meresika rumah.
“Program Pengawa Ngemanah enggau Meresi Pengudah Ampuh Bah ke diatur ba Kampung Sinar Budi Lama sehari tu (kemari) mega iya nya ketegal peminta Kaban Kunsil Nengeri (ADUN) Batu Kawah.
“Tu iya nya kelai positif lalu sida nyambut peminta sereta enda semina ngemata aja ngambika ulih dikemanah enggau lengkas ngambika pengelantang peranak ulih diatur enggau lengkas,” ku iya lebuh ti ditemu kemari.
Iya ke mega sama disempulang Sekretari Politik ba Opis Kepala Menteri Tan Kai madahka pengawa nya mega bisi dipejalai ba Kampung Sungai Tengah ba Matang enggau Kampung Rantau Panjang ditu.
Ku Khirudin nambah, taja raban JBPM benung kiruh enggau SARS, telefon Servis Khas enggau COVID-19 di kandang menua Zon Mirah di Sibu sida tetap ulih meri srvis nyema bisi kerejasama ari komuniti.
Sida ti bekaul sama enggau program nya Bomba Komuniti, Gerempung Ukai Dikuasa Perintah, Opis Kaunsil Mengeri Padawan (MPP), Opis Pelilih Menua Kuching, Opis Bekal Ai Menua Pesisir (JBALB) enggau Lembaga Air Kuching (KWB).