KUCHING: Sesi sekula taun 2021 ba Sarawak, belajar chara betunga mua ti berengkah 20 Januari tu semina ditetapka ngagai nembiak ke ngambi peresa perintah ungkup taun 2020 enggau 2021 sereta peresa antarabansa ti setara.
Sapit Kepala Menteri, Datuk Amar Douglas Uggah Embas madahka, nya pemutus ti udah digaga bekaul enggau operasyen Institusyen Pelajar ari baruh Opis Menteri Pelajar Malaysia (KPM) ba kandang menua Atur Nagang Pemindah (PKP) enggau Atur Nagang Pemindah Bisi Penetap (PKPB) ba Nengeri Sarawak.
“Sekula ba kandang endur PKP enggau PKPB dipejalaika ba Nengeri Sarawak, sesi sekula betunga mua semina ditetapka ngagai nembiak ti ngambi peresa Sijil Pelajaran Malaysia (SPM), Sijil Vokasional Malaysia (SVM), Sijil Kemahiran Malaysia (SKM), Sijil Tinggi Persekolahan Malaysia (STPM), Sijil Tinggi Agama Malaysia (STAM) enggau Diploma Vokasional malaysia (DVM) taun 2020 enggau 2021 sereta peresa antarabansa ti sama.
“Nembiak sekula ‘berasrama penuh’ enggau ‘asrama sekolah harian’ ti deka ngambi peresa nya dikemendarka pulai ke buding berengkah 16 Januari 2021 baka ti dibantai sereta dipadahka KPM sebedau tu,” ku iya.
Uggah ti mega Chairman Komiti Mutarka Penusah Ngenyit Nengeri Sarawak (JPBNS) mansutka pekara nya nyerumba aum pengarang berita COVID-19 Sarawak ti diatur ba Bengunan DUN Lama ditu, kemari.
Lebuh ti ngenang pemutus bekaul enggau sesi sekula, Uggah madahka, semua nembiak Sekula Primary enggau Sekula Secondary kelimpah ari kelas ke ngambi peresa perintah ba kandang PKP enggau PKPB dipejalaika, enda besekula tauka belajar chara betunga mua.
“Kelimpah ari nya, semua nembiak Sekula Primari (Prasekolah, Primari 1 ngagai Primari 6) enggau nembiak Pom 1 ngagai Pom 4 ba Sekula Sekondari dalam kandang endur PKP enggau PKPB dipejalaika ba nengeri Sarawak deka belajar ngena chara Ngajar enggau Belajar di Rumah (PdPR) nitihka chara ke setipak ba pengajar enggau nembiak berengkah 20 Januari 2021.
“Atur tu mega dikena sama ngagai nembiak Semester 2 SVM enggau Semester 2 DVM Taun 2020 ba Kolej Vokasional Nengeri Sarawak,” ku iya.