KUCHING: Semua pengaji enggau pengereja pengawa dikeingat ngambika terit nitihka Akta Pengelikun enggau Pengerai Bekereja (AKKP) 1994, kena ngurangka risiko rampit COVID-19 ba endur kereja.
Chairman Institut Keselamatan dan Kesihatan Pekerjaan Negara (NIOSH) iya nya Datuk Wilson Ugak Kumbong madah, nambah nya pengaji enggau pengereja pengawa mega patut nitihka semua undang-undang ti bekaul enggau kereja.
Iya madah NIOSH beratka pekara nya berindik ari igi penyakit COVID-19 mega bisi berampit ba endur kereja sekalika ngerampit pengereja pengawa menua tu tauka menua luar.
“NIOSH deka ngingatka semua pengaji enggau pengereja pengawa ngambi nitihka AKKP 1994 sereta semua undang-undang ti bekaul enggau kereja.
“Atur nyaga diri ti terit deka ulih mantu perintah ba pengawa ngurangka risiko ramppit COVID-19 ba endur kereja.
“NIOSH minta pengaji ngambi ngaluska semua pengawa mansik risiko enggau ngemanahka agi prosedur kereja ungkup industri berisiko tinggi baka pekereja ti betapi terus ngagai pesakit tauka pelawat ti bisi simptom,” ku iya, nengah penerang berita, kemari.
Kebuah pia ku iya, laban pengaji ngembuan tanggungpengawa sereta patut beratka pengelikun, pengerai enggau pengelantang pendiau pengereja pengawa.
“Lebih agi pengaji ti ngaji pekerja menua luar, sida patut ngenukuka pekereja nya beperesa swab test dulu enggau semina sida ti pemutus negatif aja dikemendarka kereja.
“Alai endur diau pekereja, takah fizikal ba alai kereja enggau nitihka SOP patut seruran dipatau enggau dititihka,” ku iya.
Kelimpah ari nya ku iya tikas pemeresi diri patut dikemeratka baka suah masu jari ngena ai enggau sabun tauka pemeresi jari.
Atur ngena sengkabung idnung enggau mulut ti ditetapka Majlis Keselamatan Negara enggau Opis Menteri Pengerai Malaysia ba premis, endur gawa sereta palan mensia mayuh mega patut ditithka.
NIOSH nengah Dust Mask Laboratory nguji chunto tauka sampel ari mayuh jenama enggau model sengkabung indu enggau mulut lebih agi kena mantu pengimport, pengilang enggau pemekal, ku iya.
“Ngena sengkabung idung enggau mulut amabt beguna kena mutuska rentayan igi penyakit berampit lebih agi ba kandang endur ti mayuh tubuh mensia,” ku iya ti mega Kaban Parlimen Hulu Rajang.