KUCHING: Bisi 166 kes baru positif COVID-19 diripotka di Sarawak ti tebal agi ditemu ba Pelilih Menua Sibu, iya nya 94 kes.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, nya nyadika penyampau kes positif COVID-19 di Sarawak bisi 1,740 kes.
“Sehari tu (kemari) bisi 166 kes baru positif COVID-19 ditemu di Sarawak ti nyengkaum ba Sibu (94), Miri (48), Kuching (15), Beluru (4), Bintulu (3), Belaga (1) enggau Samarahan (1). Tu ngujungka penyampau semua kes positif COVID-19 ba Sarawak nambah nyadi 1,740 kes.
“Kes positif COVID-19 baru di Sibu, ari 94 kes nya nyengkaum 88 kes ti diperesa bekaul enggau Klsuter Pasai, 4 kes diperesa bekaul enggau kontak ngagai kes positif COVID-19 enggau dua kes asil peresa ke bukai COVID-19.
“Lalu, 48 kes baru di Miri nyengkaum tujuh kes ti diperesa maya pulai ari kandang endur berisiko rampit COVID-19 (Kelantan (2), Kuala Lumpur (2), Labuan (1), Melaka (1) enggau Selangor (1)); 4 kes ti diperesa bekaul enggau Kluster Bah Sayap; 3 kes diperesa bekaul enggau Kluster Pasai; 1 kes diperesa bekaul enggau Kluster Stutong; 1 kes diperesa maya pulai ari menua luar (Brunei) ti bekaul enggau peranak Malaysia (rayat Sarawak) enggau 32 kes bekaul enggau beperesa bukai COVID-19,” ku JPBNS, kemari.
Nambahka nya, 4 kes positif COVID-19 di Beluru bekaul enggau kontak ngagai kes positif COVID-19; 1 kes di Pelilih Menua Samarahan ti diperesa bekaul enggau Kluster Stutong lalu siti kes ke dirikotka ba Pelilih Menua Belaga ti bekaul enggau Kluster Pasai.
“Bisi 15 kes baru positif COVID-19 di Kuching (kemari) iya nya nyangkaum 10 kes ke diperesa maya pulai ari kandang menua berisiko rampit COVID-19 (Selangor (5), Luala Lumpur (2), kedah (1), Sabah (1) enggau Negeri Sembilan (1); 2 kes diperesa bekaul enggau Kluster Stutong; 1 kes diperesa bekaul enggau Kluster Keranji Tabuan enggau 2 kes bekaul enggau beperesa bukai ti bekaul enggau COVID-19.
“Tiga kes positif COVID-19 baru (kemari) di Bintulu iya nya nyengkaum dua kes diperesa bekaul enggau kes positif COVID-19 enggau siti kes diperesa pulai ari kandang endur berisiko rampit COVID-19 di Melaka,” ku JPBNS.
Nambahka nya JPBNS madah kemari bisi tujuh kluster COVID-19 agi aktif ba Sarawak iya nya Kluster Bukit Sekubong, Sebauh; Kluster Jelita , Miri; Kluster Pasai, Sibu; Kluster Keranji Tabuan, Kuching; Kluster Bah Sayap, Miri; Kluster Stutong, Kuching enggau Kluster Mador, Meradong.
Bekaul enggau status nitihka pelilih menua di Sarawak, nitihku penerang berita JPBNS, kemari, Pelilih Menua Kuching, Sibu enggau Merah agi bestatus Mirah enggau penyampau 449 kes berampit dalam tiga pelilih menua nya dalam timpuh 14 hari ke udah.
Pelilih Menua Sebauh agi bestatus Oren enggau 21 kes.
Pelilih Menua Beluru, Dalat, Selangau, Samarahan, Sri Aman, Bukit Mabong, Meradong, Bintulu sereta Limbang agi bestatus Kuning enggau penyampau 34 kes berampit dalam pelilih menua tu dalam timpuh 14 hari ke udah sereta bisi 27 pelilih menua ke bukai ba Sarawak agi bestatus Gadung.
Kelimpah ari nya, JPBNS ngeripotka kemari bisi empat kes baru udah gerai sereta dikemendarka pansut ari Sepital Miri, tu ngujungka penyampau semua kes positif COVID-19 ti udah gerai sereta dikemendarka pansut ari sepital nambah nyadi 1,122 tauka 64.48 peratus ari penyampau semua kes COVID-19 ba Sarawak.
“Penyampau semua kes ti agi diperubat enggu diengkah kediri ba sepital bisi 597 iku nyengkaum 296 kes ba Sepital Sibu; 181 kes ba Sepital Miri; 93 kes ba Sepital Besai Sarawak enggau 27 kes ba Sepital Bintulu.
“Sehari tu (kemari) bisi 268 PUI baru udah diripotka enggau 53 PUI ke agi nganti pemutus peresa makmal,” ku JPBNS.
Bisi 307 Person Under Surveillance (PUS) udah ngerejista tama sereta dikuarantin ba hotel, ti ngujungka penyampau semua PUS ba 52 buah hotel enggau SC Ukai hotel naka kemari bisi 5,123 iku.