KUALA LUMPUR: Pengawa Bepilih Besai (PRU), Pengawa Bepilih Nengeri (PRN) enggau Pengawa Bepilih Mit (PRK) nadai diatur sekumbang timpuh emergensi ti ditetapka nyentuk 1 Ogos ke deka datai, pia ku Tan Sri Muhyiddin Yassin.
Menteri Besai madah, iya nadai ati enda ngatur pengawa bepilih, tang pekara besai ti nagang iya nya ngelalau Yang di-Pertuan Agong ngererak Parlimen ngambika pengawa bepilih diatur, iya nya pandemik COVID-19.
“Pemutus tu setipak enggau siti ari lima prinsip maqasid syariah iya nya nyaga nyawa. Dalam konteks tu endang patut ba aku ti nyadi ketuai perintah nyaga nyawa rayat enggau chara nyaga ari di rampit COVID-19.
“Tu pemaik ke pemadu besai ti dipinta jalai pengarap Islam,” ku iya dalam jaku pesan khas emergensi ti ditaburka terus nengah stesyen televsyen menua kemari.
Taja pia, Muhyiddin meri komitmen ke alai pengawa bepilih deka diatur enti Komiti Khas Bebas ngaku tauka netap iya nya penyakit COVID-19 udah belinsur kurang tauka punas magang ngambika pengawa bepilih ulih diatur enggau likun.
“Baka selama, pengawa bepilih mit mesti diatur dalam timpuh 60 hari pengudah sitak ditetapka puang, pengawa bepilih nengeri mega diatur dalam timpuh 60 hari pengudah Kunsil Nengeri direrak.
“Taja pia kitai nemu rayat diatu enggaika pengawa bepilih diatur kena nyeliah penyakit COVID-19 berampit baka PRN Sabah apin lama,” ku iya.
Muhyiddin madah, pengudah Komiti Khas Bebas ti deka ditumbuhka ila ti netapka pengawa bepilih likun diatur, bepanggai ba rayat deka milih perintah ke patut ngiring menua enggau nyaga pengelantang pendiau rayat.
“Tu iya nya komitmen lalu aku besemaya aku deka ngamatka, insya-Allah,” ku iya.
Nitihku iya,dalam gaya menua enggau rayat ke benung betapi siti penusah besai, endang patut amat semua kaban politik nyeliahka bida sereta patut besolidariti begulai enggau rayat.
“Lebuh datai ba maya bepolitik, maya nya mega bepolitik enggau penuh bisi tanggungpengawa,” ku iya.
Kelimpah ari nya, Muhyiddin madah, sekumbang timpuh emerjensi dipejalaika, Parlimen enggau Kunsil Nengeri enda baum nyentuk ke timpuh ti ditetapka Yang di-Pertuan Agong.
Dulu ari nya, Yang di-Pertuan Agong Al-Sultan Abdullah Ri’ayatuddin Al-Mustafa Billah Shah Netapka Proklamasi emergensi dipejalaika nyentuk 1 Ogos ke deka datai ti nyadi chara proaktif kena nagang penyakit COVID-19 di Malaysia. — Bernama