SRI AMAN: Peranak di menua pesisir dipinta majak meri sukung ngagai perintah nengeri kena nentuka menua pesisir ulih dikemansangka baka di mengeri.
Kaban Kunsil Nengeri Bukit Begunan,Datuk Mong Dagang madahka rayat kelebih agi ba DUN Bukit Begunan mesti meri sukung penuh ngagai perintah ke diatu, kena nentuka pemansang ulih digaga.
“Enti nadai sukung penuh ngagai perintah, perintah ke diatu enda ulih ngaga pemansang baka ke udah diperambu sebedau tu,” ku iya.
Iya bejaku mu nyi nya ba Pengereami Ketuai Begulai enggau Rayat ba Rumah Denis Unop, Munggu Sawa seraya nyuaka setipikit nampung pengawa nyadi Tuai Rumah Jampang Tibu, Munggu Sawa Ili ditu, kemari.
Berebak enggau nya, Mong madahka perintah nengeri diatu benung bebendar mai pemansang nengah projek transformasyen menua pesisir (RTP) ba sitak DUN Bukit Begunan.
Ku Mong, rayat ke diau mendam di menua pesisir, patut nemu beratika pemadah ti dikunsi dalam media sosial.
“Anang kelalu mudah pechayaka pemadah ti dibantaika dalam media sosial, kita patut mansik dulu pengamat tetiap berita sebedau bekunsika nya,” ku iya.