Anda di sini

Agong ngemendarka emergensi dipejalaika di Malaysia

Advertisement
AL-SULTAN ABDULLAH
AL-SULTAN ABDULLAH

KUALA LUMPUR: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah, udah ngemendarka Netapka Proklamasi Emergensi dipejalaika nyentuk 1 Ogos, ti nyadi atur proaktif kena nagang penyakit COVID-19 di Malaysia.

Datuk Pengelola Bijaya Diraja Istana Negara, Datuk Ahmad Fadil Shamsuddin dalam penerang Istana Negara, madahka Seri Paduka ngemendarka meri timpuh bejalaika atur emergensi nya tauka nyentuk ngagai siti hari bulan ti tumu agi, enti penyampau kes positif COVID-19 ninting hari ulih dijaga sereta dikurangkja enggau efisyen.

Al-Sultan Abdullah mega setuju enggau langgur penemu perintah numbuhka siti Komiti Ngatika Diri ti diarika Kaban Parlimen Perintah enggau Penyakal nyengkaum bala tebangkar pengerai ke bekaul.

“Komiti Ngatika Diri tu deka meri langgur penemu ngagai Seri Paduka Baginda nyema atur emergensi tu ulih diketuka tumu agi,” ku iya.

Ku Ahmad Fadil, pengawa ngemendar diputuska pengudah beratika randau Seri Paduka enggau Raja-Raja Melayu.

Menteri Besai Tan Sri Muhyiddin Yassin udah madahka pemutus Aum Raban Kabinet bekaul enggau perambu Netapka Proklamasi Emergensi lebuh kena datai betemu enggau Al-Sultan Abdullah di Istana Negara pukul 5.30 lemai ensanus (11 Januari), kena nagang enggau ngelandaikan kes positif COVID-19 ninting hari ke udah manggai ba empat iti lumur diatu.

Ku iya, Seri Paduka ngaluska penerang ari Menteri Besai sereta mending Akim Menua Tan Sri Idrus Harun, Panglima Raban Soldadu Tan Sri Affendi Buang, Kepala Polis Menua Tan Sri Abdul Hamid Bador, Ketuai Direktor Pengerai Tan Sri Dr Noor Hisham Abdullah enggau Chairman Opis Pengawa Bepilih, Datuk Abdul Ghani Salleh.

“Ba penemu Al-Sultan Abdullah, pengelekai penyakit COVID-19 di menua tu diatu udah manggai ba renggat ke amat kritikal sereta patut Ditetapka Proklamasi Emergensi bepelasarka Fasal (1) Pekara 150 Konstitusyen Perintah Besai,” ku iya.

Ku Ahmad Fadil, Al-Sultan Abdullah ti ngemendarka nya mega endang ngira pengelikun rayat enggau pekara ti dikemeratka menua bepelasarka statistik COVID-19 ke diatu, kelimpah penanggul perengkaguna logistik nitihka nengeri ti dipadahka maya meri penerang nya.

Nitihka statistik, 15 sepital COVID-19 ngerikod penyampau katil ti dikena ketegal COVID-19 (ukai Unit Siru Intu (ICU)) ti ngelui ari 70 peratus di Lembah Klang, lalu  penyampau katil ICU ungkup orang ke sakit COVID-19 di Sepital Kuala Lumpur enggau Palan Perubat Universiti Malaya udah manggai 100 peratus, lalu ba Sepital Sungai Buloh (83 peratus).

Penyampau katil ICU ke dikena orang ke sakit COVID-19 di Perak, Selangor, Melaka, Terengganu enggau Sarawak ngelui 70 peratus.

Ku Ahmad Fadil, Al-Sultan Abdullah siru amat ke pengelikun semua rakat, kelebih agi ba maya ke diatu, rakyat ba sekeda nengeri mengkang napi penanggul ampuh bah.

“Seri Paduka Baginda madahka diri bisi pengirau ati ngagai empas ampuh bah enggau penambah ngenyit rampit COVID-19 di menua tu. Nyema enda ditagang enggau efisyen, nya deka meri  penusah ngagai pengerai rayat enggau pengelantang menua,” ku iya.

Naka ensanus, penyampau kes aktif enggau penau COVID-19 berampit di Malaysia bisi 28,554 kes ti tau nyadi kes positif sebpenyampau 138,224. Bisi 2,232 kes baru diripotka ensana.

Berebak enggau, Al-Sultan Abdullah ngelalau rayat ngambika rayak anang mudah kesal ati, lalu liat ati napi emergensi enggau Atur Nagang Pemindah (PKP) ti dipejalaika, ke pemaik semua.

Ensanus, Menteri madahka PKP diteritka di enam nengeri iya nya Pulau Pinang, Selangor, Wilayah Persekutuan (Kuala Lumpur, Putrajaya enggau Labuan), Melaka, Johor enggau Sabah, pengelama 14 hari berengkah ari 13 Januari.

Berebak enggau nya, enam nengeri ke bukai iya nya Pahang, Perak, Negeri Sembilan, Kedah, Terengganu enggau Kelantan diteritka PKP Bisi Penetap (PKPB), lalu PKP Mulaika Pemaik (PKPP) dipejalaika di Perlis enggau Sarawak.

Al-Sultan Abdullah mega minta rayat bedisiplin ngasika pentin prosedur operasyen standard (SOP) enggau semua jaku tesau ti ditetapka perintah enggau ejensi ke bekaul sekumbang timpuh emergensi enggau PKP dipejalaika.

“Seri Paduka mega pechaya nengah pengeran enggau kerejasama semua rayat baka ti udah dipandangka maya PKP ti dipejalaika taun nyin tadi, kitai sekali agi ulih nagang pengelekai penyakit COVID-19 enggau efisyen,” ku Ahmad Fadil.

Al-Sultan Abdullah mega ngarapk vaksin COVID-19 ti deka diterima ila, ulih ngelandaika graf pandemik, sereta mutuska rampit COVID-19 di Malaysia.

Seri Paduka meri besai terima kasih ngagai ‘hero’ enggau ‘wirawati’ terabai menua ti gawa ninting hari, ti berambunka nyawa sereta bebendar gawa enda ngira diri lelak enggau jam gawa maya ti bejalaika tanggungpengawa ngelaban COVID-19.

Kelimpah ari nya, Al-Sultan Abdullah mai rayat enggau iya sama besampi ngambika Malaysia semanpai dipayung ari semua bansa penusah, lalu penyakit COVID-19 ulih ditagang sereta dipunaska enggau lengkas.

Yang di-Pertuan Agong mega mai semua rayat besampaika orang ti tasah ketegal ampuh bah ke nyadi ba beberapa buah nengeri ke diatu, ngambika sida badu napi penusah nya. — Bernama

Advertisement