SARIKEI: Perintah Sarawak udah ngemendarka agih belanja RM55 juta kena ngaga Jalai Sungai Mujok di Julau.
Kaban Kunsil Nengeri Meluan, Rolland Duat Jubin madahka perengkaguna tu deka muka lambar baru ba pengidup peranak dalam kandang menua nya kelebih agi sida deka ngasaika sistem jalai alun ke manah.
“Pengawa ngaga projek tu deka muka akses enggau mayuh agi peluang sosioekonomi, kelebih ati ti bepelasarka aktiviti betanam betupi enggau industri bumai bekebun.
“Nengah pemisi akses penyambung darat ngagai kandang kandang menua tu, bala orang bumai enggau bekebun mit ulih nambahka asil jual sida, ti ngujungka sida ulih ngasaika tikas pengidup ke manah agi,” ku Rolland.
Iya bejaku munyi nya ba Pengerami Bejadi Biro Indu di Rumah Nyanau Kelukut, Nanga Telesa, Sungai Mujok empai lama udah.
Urung 150 bisi ngulu pengerami nya.
Rolland mega madah, pemansang infrastruktur deka nyaup muka mayuh agi kandang menua dikena merangsang aktiviti dagang enggau pemansang sektor bukai ba kandang menua enggau ke ngelingi nya, sereta ngerichahka sosioekonomi peranak di menua nya.
Nya alai, iya ngansak peranak ba kandang menua Sungai Mujok enggau di Julau ngemansangka tanah adat sida.
“Perintah Nengeri Sarawak diatu mega benung ngaga Projek Skim Elektrifikasyen Menua Pesisir (RES) Miles Fasa Fasa Dua ba sitak N.48 Meluan iya nya di Ulu Entabai ngena ungkus kunterik ke sepenyampau RM17 juta sereta di Ulu Kanowit enggau Mujok ke beungkus RM25 juta.
“Projek RES Last Miles Fasa 3 diatu benung dalam proses ditinda.
“Tu mandangka perintah ke ngelama tu ngintu pengelantang pendiau sereta ngemeratka rayat Sarawak nyengkaum peranak ba sitak Meluan,” ku Rolland.
Ba pengerami nya, Rolland udah ngemendarka belanja RM20,000 ungkup Komiti Pemansang enggau Pengelikun Genturung Pendiau (JKKK) Rumah Nyanau sereta nyuaka cek RM7,000 ngagai Biro Indu, kena ngatur program ti udah dip erambu ungkup taun tu.
Sama bisi ngulu pengeami nya, Penyanding Penemu Biro Indu DUN N.48 Meluan Sheila Ulat Pengarah, Penghulu Kawasan Ensiring enggau Mujok Robert Datu sereta ketuai raban bansa di menua nya.