KUCHING: Parti Sarawak Bersatu (PSB) ti betuaika Presiden parti nya Dato Sri Wong Soon Koh nadai ati begempung enggau Gabungan Parti Sarawak (GPS) tang deka nyilih serakup parti nya merintah nengeri tu.
Soon Koh madahka sida iya chukup terang bekaul enggau prinsip sereta penegap penemu parti.
“Kami (PSB) meri pengandal ngagai penyukung enggau rayat Sarawak ke alai kami nadai ati deka begempung enggau GPS tang deka nyilih GPS.
“Prinsip enggau penegap penemu kami nyata amat, kami mega enda deka nimbal, tauka diajar, parti tauka kaban politik bukai.
“Kami PARTI SARAWAK BERSATU - ungkup Sarawak, enggi Anak Sarawak, beserakup ari baruh siti perabung ti mai ubah enggau lebih manah ngagai Sarawak,” ku iya.
Soon Koh ti mega Kaban Kunsil Nengeri Bawang Assan nerangka pekara nya nengah penerang berita iya, kemari.
Iya madahka PSB enda tekeruga, enda beguyat sereta deka terus bejalai enggau beserakup dalam penaluk enggau rayat Sarawak.
Dulu ari nya, dalam penerang iya madah PSB iya nya parti ngatika diri ti bepalan ba Sarawak, ngelalu sereta deka bekerejasama enggau parti ti bisi juluk ke sama deka nempa Sarawak nyadi lebih manah.
Sarawak ti sama enggau numbuhka Malaysia ku iya, bisi hak penuh ba pekara ti ditetapka ari baruh Sempekat Malaysia 1963 (MA63).
“Nyadi sebuah parti ti bepalan di Sarawak, kami udah berunding enggau sida (parti) penyakal di nengeri tu ke sama runding,ngiga jalai begulai begulai ba kuasa politik sereta berejasama.
“Taja pia kami tetap bepegai tegap ba prinsip kami sereta arapka semina peranak menua sarawak ti patriotik aja meretika pengeran enggau pelasar ti patut dikena merintah Sarawak enggau chara pengidup, ti nerima orang bukai, enda ngira bansa enggau jalai pengarap.
“Kami pechaya ngaga jematan kena beserakup, ukai dinding kena nyapat tauka mambarka,” ku iya.
Bejaku baru Soon Koh madah, diatu ketegal penemu parti tu, parti udah ‘ditangkan’ enggau chara tebuka kaban penyakal bukai ti madahka PSB semina ‘junior partners’ dalam rintai penyakal, sereta dichap lalu dikumbai nyadi ‘Pro-GPS’ dalam media sosial.