MIRI: Orang ti megai pas penemuai rama ti ukai rayat Sarawak ke udah abis timpuh berindik ari Atur Nagang Pemindah Mulaika Pemanah (PKPP) dikemendar diau ba Sarawak nyentukka timpuh PKPP ti dilanjar ngagai 31 Mac 2021.
Pekara nya dipadahka Menteri Muda Dagang Temuai, Seni enggau Main Asal Datuk Sebastian Ting dalam penerang media iya bedau lama ti udah.
“Aku ngenataika pengandal ati ngagai sida laban dikemendar agi ditu nyentuk 31 Mac 2021, lalu pia mega kitai ngarapka pandemik COVID-19 di Malaysia sereta selampur dunya deka ulih ditagang enggau manah ngena vaksin ti engkeman.
“Berapa bulan ke udah, aku udah ditanya peranak ti ukai orang Sarawak ke madahka pas penemuai rama sida abis timpuh lalu udah dipadahka iya nya sida patut pulai sebedau tauka kena 31 Disember 2020 iya nya pengabis PKPP.
“Taja pia, sida ngenataika pengirau ati lalu enda nemu baka ni chara deka ngelangkar pejalai pulai ari Sarawak,” ku iya.
Pemegai pas penemuai rama tu iya nya sida ti datai ari Semenanjung Malaysia, Sabah enggau Brunei sereta bisi sekeda menua bukai.
“Bisi entara sida ti kawin enggau rayat Sarawak lalu diau ditu begulai enggau ruang bilik diri empu,” ku iya.
Ku Ting nambah, iya ngarika raban ti bekaul beterima kasih ngagai perintah Sarawak ti udah bebatak asur enggau gaya maya pandemik ti nyadi diatu.