KUCHING: Bisi 16 kes baru positif COVID-19 diripotka ba Sarawak ti dirikodka ba Pelilih Menua Kuching, Miri, Samarahan enggau Julau, kemari.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, pemadu mayuh dirikodka ba Pelilih Menua Kuching.
“Sehari tu bisi 16 kes positif COVID-19 baru ditemu di Sarawak iya nya ba Pelilih Menua Kuching bisi 10 kes, Miri (4 kes), Samarahan (1 kes) enggau Julau bisi siti kes.
“Tu ngujungka penyampau semua kes positif COVID-19 ba Sarawak nambah nyadi 1,196 kes,” ku JPBNS, kemari.
Nitihku JPBNS, lima (Kes 1,181; 1,183; 1,188; 1,191 enggau 1,192) ari 10 kes ke ditemu ba Pelilih Menua Kuching iya nya kes berampit dalam pelilih menua tu ti nyengkaum siku anak mit beumur setaun, peranak menua (Sarawak).
“Kes 1,181 iya nya siku anak mit beumur setaun peranak menua (Sarawak) ti ditemu bisi kontak semak enggau kes 1,158.
“Kes 1,183 iya nya siku lelaki peranak menua (Sarawak) ti diperesa laban bisi kontak semak enggau kes 1,144 iya nya bakih sama endur kereja. Kes 1,118 siku indu peranak menua (Sarawak) ti bisi kontak sosial ngagai kes 1,168.
“Kes 1,191 enggau 1,192 iya nya dua iku peranak menua (Sarawak) ti diperesa laban ti diri sebilik sereta kontak semak ngagai kes 1,179. Kes 1,191 iya nya siku anak mit beumur empat bulan kala tabin kena 31 Disember 2020. Kes 1,192 nadai ngayanka tanda,” ku JPBNS.
Empat (Kes 1,184; 1,185; 1,189 enggau 1,190) agi ari 10 kes baru ba Plilih Menua Kuching kemari iya nya bekaul enggau individu ti diperesa pulai ari kandang endur berisiko enggau beperesa sebedau pulai ke Sabah.
Kes 1,184 enggau 1,185 bekaul enggau dua iku raban Soldadu Langit (TUDM) ti beperesa COVID-19 laban pulai ari Semenanjung Malaysia, lalu maya datai ba Kuching ngena penerebai TUDM seduai dikuarantin ba palan kuarantin sereta diperesa kena 6 Januari 2021 lalu ditemu positif kena 7 Januari 2021.
Kes 1,189 enggau 1,190 iya nya dua iku peranak menua (Selangor enggau Kelantan) ti tama ke Sarawak nengah Padang Bilun Antarabansa Kuching (KIA) ari Padang Bilun Antarabansa Kuala Lumpur kena 6 Januari 2021 sereta dikuarantin ba palan kuarantin.
“Lalu siti agi kes ari 10 kes di Pelilih Menua Kuching iya nya Kes 1,186 bekaul enggau siku lelaki peranak menua (Sabah) ti beperesa ba sebuah klinik pengerai perintah di Mengeri Besai Kuching kena 6 Januari 2021 ti dikena nitihka atur sebedau tama ke Sabah. Kes ditemu positif ba hari ke sama.
“Kes nadai tanda dirampit COVID-19, udah dipasuk ba Sepital Besai Sarawak sereta dikategori nyadi kes berampit dalam pelilih menua tu. Pengawa nyidi kontak kes benung dipejalaika Opis Pengerai Bagi Menua Kuching,” ku JPBNS.
Bekaul enggau empat kes ditemu ba Pelilih Menua Miri, ari penyampau nya bisi tiga bisi kaul enggau kontak semak Kluster Bah Sayap, Miri.
Nitih ku JPBNS Kes 1,193; 1,194 enggau 1,196 iya nya peranak menua ti ditemu bisi kontak semak enggau kes positif ari Kluster Bah Sayap di Pelilih Menua Miri.
“Kes 1,193 iya nya kontak serumah lalu kes 1,194 iya nya kontak sosial kes 1,149. Lalu Kes 1,196 siku anak mit lelaki beumur tiga (3) taun peranak menua (Selangor) iya nya kontak ngagai kes 1,137 ti bakih sama kereja enggau apai kes.
“Lalu siti agi kes baru di Pelilih Menua Miri iya nya Kes 1,195 bekaul enggau siku lelaki peranak menua (Sarawak) ti ditemu nengah pengawa nganjung diri beperesa sebedau ke Labuan.
“Kes (1,195) bisi sejarah pejalai ke Kuala Lumpur lalu pulai ke Kuching kena 13 Disember 2020 sereta dikuarantin ba palan kuarantin enggau bisi diambi peresa rT-PCR COVID-19 dua kali lalu pemutus negatif.
“Kes (1,195) ari Kuching ke Sibu ngena penerebai kena 4 Januari 2021 ketegal bisi kereja pengelama tiga hari dua malam. Kena 6 Januari maya ba Miri iya diperesa ngena kit peresa jampat antigen COVID-19 ba sebuah sepital peribit lalu ditemu positif. Kes tu diketegori kes import C ari Kuching,” ku JPBNS.
Nambahka nya, bekaul siti kes positif baru di Pelilih Menua Samarahan, Kes 1,182 iya nya siku indu peranak menua (Sarawak) ti beperesa COVID-19 kena 6 Januari 2021 laban deka terebai ke Singpura sereta iya ditemu positif kena 7 Januari 2021.
Kelimpah ari nya siti kes baru positif COVID-19 ditemu ba Pelilih Menua Julau iya nya Kes 1,187, siku lelaki peranak menua (Sarawak) ti pulai ke Sibu ari Johor nengah Padang Bilun Antarabansa Senai ke Padang Bilun Sibu kena 4 Januari 2021.
Ku JPBNS, kes diasuh kuarantin ba rumah pengelama 14 hari sereta dilekatka gelang.
“Kes udah neruska pejalai ari Padang Bilun Sibu ke rumah kes di Rantau Pitak, Julau. Pemutus peresa kena 4 Januari 2021 ditemu positif COVID-19 kena 5 Januari 2021,” ku JPBNS.