Anda di sini

GPS parti ti pemadu manah ungkup rayat Sarawak: Rohani

Advertisement
 Rohani (tengah) disempulang temuai dipebasa ke bukai begambar ungkup kenang enggau penerima geran projek mit menua pesisir ungkup DUN Sebuyau.
UNGKUP ALBUM: Rohani (tengah) disempulang temuai dipebasa ke bukai begambar ungkup kenang enggau penerima geran projek mit menua pesisir ungkup DUN Sebuyau.

SEBUYAU: Gabungan Parti Sarawak (GPS) ari baruh pegai Kepala Menteri Datuk Patinggi Abang Johari Tun Openg endang pilih ti pemadu manah ungkup rayat Sarawak.

Penyanding Penemu ba Opis Kepala Menteri Dato Sri Rohani Abdul Karim madah, GPS seruran ngemeratka guna rayat ke alai penyiru perintah tu dipandangka nengah bemacham pelin pemansang.

Pia mega, ku Kaban Parlimen (MP) Batang Lupar nya nyemetak madah, GPS seruran ngamatka semaya enggau ngemeratka hak Sarawak, sama baka rambai jaku parti tu iya nya ‘Sarawak First’.

“Berati ngagai nama ti dipejalai perintah Sarawak nyentukka diatu, nadai kebuah rayat enda meri sukung ngagai GPS kelebih agi maya pengawa bepilih ti deka dtai,” ku iya.

Iya madah munyi nya lebuh ti bejaku maya pengerami nyuaka bantu Geran Agih Belanja Projek Mit Menua Pesisir (MRP) enggau Projek Mesra Rakyat (PMR) Kaban Parlimen Batang Lupar 2020 ari baruh Agih Belanja Khas Menteri Besai Malaysia enggau Kepala Menteri Sarawak (Fasa 2) ungkup Kunsil Nengeri (DUN) Sebuyau ba Balai Pemansang Sebuyau, bedau lama ti udah.

Beserimbai enggau nya, Rohani ngansak rayat Sarawak ngambika terus mekuh ngagai pengidup enggau ‘norma’ baru ti dikemeranka diatu dalam betapi enggau penguji pandemik COVID-19 ti nyadi ba selampur menua diatu.

Ku iya madah nyemetak, ulah ti enda ibuh sereta ilap ari rayat dalam bejalaika norma baru pengidup ti nyadi pun ti ngasuh kes COVID-19 majak nyadi di menua tu.

Ku iya nambah, rayat dipeda kelalu lantang bejalaika pengidup besehari-hari ti enda ngasika Prosedur Operasyen Standard (SOP) ke udah ditetapka perintah.

Nitih ku iya, taja udah dipeda ngena sengkabung idung enggau nyawa ba palan mensia mayuh, tang seraka fizikal kelebih agi ba palan mensia mayuh tu agi kurang.

Berindik ari nya, ku iya, nyadi rayat ti ngembuan tanggungpengawa, kitai mesti nitihka atur ti udah ditetapka ari perintah kena mutuska rentayan pandemik COVID-19.

“Aram mih kitai begulai ngelaban pandemik tu nyentukka kitai ulih menang,” ku iya.

Ba pengerami nya, iya udah nyuaka geran Agih Belanja MRP enggau PMR ngagai 24 gerempung, Komiti Pemansang enggau Pengelikun Genturung Pendiau sereta surau ti ngaul penyampau semua nya RM419,000.

Advertisement