MIRI: Bisi 216 iku udah beperesa COVID-19 (rT-PCR) bekaul enggau kluster Bah Sayap di Miri, enggau 153 iku ti diripotka negatif lalu 63 iku agi nganti pemutus makmal.
Pekara tu udah dipadahka menteri ti megai tanggungpengawa Komiti Mutarka Penusah Ngenyit Bagi Menua (JPBB) Miri Datuk Lee Kim Shin ba penerang media iya kemari.
Ku iya, komiti nya udah nerima mayuh tanya bekaul enggau kluster Bah Sayap kelebih agi bekaul enggau kes positif sereta nama ti deka digaga nangkanka nya.
“Prosedur Operasyen Standard (SOP) deka dipejalai JPBB Miri ninting kali bisi kes positif COVID-19 diripotka.
“Opis Pengerai deka lengkas mansik sereta nyidi kontak semak ti nyadi sebagi ari strategi kena nyeliahka pengelekai igi penyakit nya. Pengawa mansik enggau nyidi kontak semak deka digaga Penulung Pemesai Opis Pengerai enggau Lutur Pengerai Mensia Mayuh.
“Sida deka bekerejasama enggau pesakit nya lalu mantu ngiga kontak semak kelebih agi dalam timpuh ti udah ditentuka,” ku iya.
Ku Lee nerang, dalam proses nyidi kontak semak nya, bala diri sebilik, bakih sama gawa sereta sida ti ditemu bisi kaul rama deka kena kuarantin ba rumah sida empu lalu deka diatur ngambika beperesa COVID-19 nitihka protokol Opis Menteri Pengerai Malaysia ti udah ditetapka.
“Kontak semak tu selalu nya sida ti bisi kaul enggau kes positif sekalika ngena sengkabung idung enggau nyawa tauka enda enggau seraka kurang ari semeter enggau timpuh 15 minit.
“Ungkup kontak orang tambang kompeni penerebai bilun, orang tambang ti duduk dua baris ba mua enggau belakang sereta baris ti bedamping enggau nya deka disidi, kena kuarantin ba rumah sida empu lalu deka diatur beperesa COVID-19.
“Penerang bekaul orang tambang diulih ari ‘manifest’ orang tambang ti diberi ari kompeni penerebai bilun ngagai Opis Pengerai,” ku Lee nerang ti mega Menteri Perengka Pengangkut.
Beserimbai enggau nya, ku Lee nerang, Opis pengerai mega deka ngatur pengawa Nyidi Kes Aktif (ACD) laban bisi kes COVID-19 kena rampit di menua tu ke bisi ditemu ba Miri.
ACD tu reti nya Opis Pengerai deka betemu enggau komuniti lalu meresa peranak enggau sistematik kena ngiga kes ti bisi dirampit.
“Pengawa meresa tu deka mekuh ngagai kandang endur gawa sereta kandang ti positif ke diripotka. Semua strategi ti dipadahka nya dikena lalu dipejalai kena nyidi kluster Bah Sayap ke ditemu ba Pelilih Menua Miri,” ku iya.
Pia mega, Komiti Mutarka Penusah Ngenyit Nengeri Sarawak mega udah ngemansutka rintai nama premis ti udah dilawa kes positif.
Semua palan nya udah diasuh mesti ngaga pengawa meresi ninting hari lalu ngadu sanitasyen ti nyadi sebagi ari SOP ti engkeman enggau SOP Opis Menteri Kandang Menua enggau Pengawa Berumah.
“Nya alai, enggau pemisi chara dikena nyeliahka nya, risiko pebngelekai COVID-19 deka kurang agi. Strategi ngemansutka nama premis, hari bulan enggau kemaya ti kena ngingatka komuniti ngambika terus ngemeranka pengawa nyeliahka COVID-19.
“Komuniti bak nadnag menua megau lih ngena aplikasyen MySejahtera kena meda baru sejarah palan ti udah dilawa sida laalu ngenukuka sekalika premis, haribulan enggau jam nya sebaka.
“Sebarang individu ke datai ke premis nya ba jam enggau hari bulan ti sama enggau bisi pengurang ari sukut nyeliahka pengelekai baka enda ngena sengkabung idung enggau nyawa, nadai seraka fizikal lalu enda ngemeranka pemeresi diri, dlalau ngambika nganjung diri ke Stadium Tertutup Miri entara pukul 8.30 pagi nyentukka 11.30 pagi maya Hari Satu nyentuk Hari Minggu ngagai Penulung Pemesai Opis Pengerami Rampa Menua ti bejalaika tanggungpengawa.
“Penulung Pemesai Opis Pengerai Rampa Menua nya deka ngenukuka penerang tu lalu meresa aplikasyen MySejahtera kita lalu deka nasat enggau chara nanya kena nentuka tikas risiko kena rampit kita,” ku iya.
Ku Lee nerang, nyema risiko tu ditemu endang berisiko, pengudah nya pengawa meresa COVID-19 deka dipejalaika.
“Tang, taja pia, nyema premis, hari bulan enggau jam nya enda sama tauka risiko kena rampit tu mit, kita ditangkan ngambika beratika tanda tauka simptom lalu ngemeranka chara nyeliah baka ngena sengkabung idung enggau nyawa, seraka fizikal enggau suahka agi ngemeranka pemeresi diri.
“JPBB Miri mega terus ngelalau komuniti ngambika terus ngemeran sereta nyeliahka 3C iya nya enda ngagai palan ti dedat (crowded place), enda ngagai palan ti sempit (confined space) lalu enda berandau kelalu dampih enggau pangan diri (close conversation) tang seruran ngemeranka 3W iya nya tuchi jari enggau ai sereta sabun (wash), kena sengkabung idung enggau nyawa ba palan mensia mayuh tauka ba palan ti bisi risiko lalu (warn) iya nya jaku tangkan ti lebih ngena konsep ngelalau diri empu baka ti dipinta Opi Menteri Pengerai Malaysia,” ku iya nambah.