KUCHING: Kontak semak kes positif COVID-19 bekaul Kluster Stutong ditu enggau Kluster Bah Sayap di Miri dipinta nganjung diri beperesa COVID-19.
Menteri Kaunsil Kandang Menua enggau Pengawa Berumah Dato Dr Dr Sim Kui Hian madahka, laban indeks dua kluster tu bisi ngelawa beberapa endur.
Entara endur ke bisi dilawa kes Kluster Stutong baka TM/Unifi Kiosk/Delli Speed Courier di Icom Square; Pejabat AIA, Milan Square; K.One Kopitiam, Milan Square; MS Shima Cafe, Icom Square, Mingkee Duck Shop, Icom Square, Enviar Tapas, S.Bistro di Galacity; TGV VivacitY; MBO The Spring; K11 enggau ST3 Outlet.
Lalu palan ke dilawa kes indeks Kluster Bah Sayap di Miri iya nya Ming Cafe, Jalan Merbau; Chillzz Bistro, Centrepoint; Rain Bar Bistro, Marina; Puma Sera, Jalan Maju; Bonzer Restoran, Hotel Kingwood, Jalan Ross dan Uniqlo, Bintang Mall, McDonalds, Popular Book, Watson, Senheng Electric Hq di Bintang Mall; MYY Chicken Rice Restaurant, Mosjaya; Starbucks, Marrybrown Miri Airport enggau Dragon Seafood Restoran di Jalan Bakam.
"Kami ti bekunsi penerang tu ukai deka ngangkatka stigma raban bansa tang ngambika sida ke bisi kontak semak enggau kes positif datai beperesa.
"Kami mega minta kerejasama pengempu premis ngambika madah terang ngagai mensia mayuh enggau volunteer nyema bisi kes bekaul enggau premis sida," ku iya.
Dr Sim madahka pekara nya nyerumba aum pengarang berita COVID-19 Sarawak ti diatur ba Bengunan DUN lama ditu, kemari.
Kemari nadai nambah kes baru bekaul Kluster Stutong dirikotka iya nya enggau penyampau semua kes positif COVID-19 agi 11 kes.
Bisi 206 individu udah diperesa lalu bisi 162 negatif enggau 33 agi nganti pemutus makmal.
Lalu Kluster Bah Sayap di Miri kemari ngerikodka bisi nambah siti kes positif COVID-19 nambahka ngagai enam kes naka ke diatu.
Bisi 71 individu udah diperesa ke alai bisi 42 negatif enggau 23 agi nganti pemutus makmal.