KUCHING: Gerempung Pengempu Ladang Sawit Sarawak (SAPPOA) mantah langgur penemu Kaunsil Minyak Sawit Malaysia (MPOB) ti deka minta CESS tambah RM5 ungkup tetiap setan metrik minyak sawit mata (CPO) enggau minyak isi puak sawit berengkah ari bulan Januari 2021.
Ketuai Pemesai Eksekutif (CEO) SAPPOA Andrew Chang madah, MPOB nguji nambahka penatai pemisi ngagai lebih RM100 juta setaun ari sektor ladang nengah CESS (Perintah Kunsil Minyak Sawit Malaysia) tang gerempung mantah langgur penemu nya.
Ku iya, pengawa mansik enggau ngemansang udah dipejalaika, lalu MPOB bisi duit turu taja pan kunsil nya madahka CESS ti deka dipinta nya dikena melanja nya.
"MPOB patut ngulihka sukung ari Opis Menteri Wang enti begunaka mayuh agi belanja tang ukai nambahka cess 35.7 peratus ari penyampau ke diatu iya nya RM13 ti ditambah RM1 baru, ti deka dipejalaika berengkah ari taun tu, maya ekonomi ke kusut ketegal COVID-19 ti nyadi ba semua orang," ku iya madah ngagai The Borneo Post kemari.
Taun tu, pengemeran industri mayar Cess RM14 ungkup tetiap setan metrik minyak sawit ti dikeluarka, nambah RM1 dibandingka enggau taun ke sebedau tu.
Pengeluar minyak sawit mata patut mayar Cess RM19 ungkup tetiap setan metrik enti langgur penemu Perintah Kaunsil Minyak Sawit Malaysia (Cess) 2020 dikemendarka kelimpah ari nadai mayar mayuh bengkah chukai enggau levi.
Nitihka pemadah ari industri, Sarawak ngasilka 4 juta tan metrik CPO ba taun 2019. Penerang nya mega madah, enti 4 juta tan metrik didarab RM19, kita nyamai amat ngumpul RM76 juta.
Penerang nya mega madahka, Malaysia ngemansutka lebih 16 juta tan metrik CPO dalam taun 2019.
Lebuh ti mantaika langgur penemu pasal CESS 2020 dalam website MPOB, Cess RM5 deka dipinta dibayar ba CPO enggau minyak puak kerubung sawit.
Bisi dipadahka mega, tuju bayar Cess tambah nya deka dikena bejalaika pansil enggau ngemansang mekanisasi enggau automasyen sawit di Malaysia kena mutarka penganggul kurang orang gawa dalam sektor ladang.
Ba jaku padah dalam website seksyen meri lisin enggau neritka adat MPOB, Kausil nya ngelaluka jaku timbal ari mensia mayuh bekaul enggau Perintah Kaunsil Sawit Malaysia (Cess) 2020 nyentuk 30 November tu.
Dalam langgur penemu nya madahk barang bagi sesapa ti enda nitihka pinta perintah nya , tau salah lalu enti amat ditemu salah, tau diukum mata duit enda ngelui ari RM1,000 tauka dijil ba pengelama enda ngelui ari enam bulan tauka kededua nya sekali.