Anda di sini

PSB deka ngelekatka 1,000 WiFi kelebih agi ba sekula di kandang menua pesisir

Advertisement
 Wong (tengah) maya ba aum pengarang berita di Sibu kemari.
KOMITED: Wong (tengah) maya ba aum pengarang berita di Sibu kemari.

SIBU: Parti Sarawak Bersatu (PSB) deka ngelekatka 'broadband' satelit WiFi ba 1,000 kandang menua di menua pesisir, kelebih agi sekula menua pesisir dalam inisiatif nyediakaka sambung Internet.

Presiden PBS Dato Sri Wong Soon Koh madah, sida udah ngelekatka lapan sistem broadband ungkup komunikasyen enggau Internet ngena satelit ba sitak Baleh.

Sekula nya Sekula Primari (SK) Nanga Meluan, SK Sungai Paku, SK Lubok Mawang, SK Temenggong Koh, SK Lepong Gaat, SK Sungai Kain enggau Sekula Sekondari (SMK) Baleh.

"Dalam beberapa minggu ke deka datai, mayuh agi ti deka bulih pemaik ari inisiatif tu laban PSB komited amat dekaka mayuh agi sekula enggau menua pesisir disambung ngena bungkur tu ari baruh inisiatif meri Internet enggau komunikasyen kelebih ba maya ke napi pemar diatu," ku iya  lebuh dikerandau pengarang berita ditu kemari.

Lebuh ke ngulu siti program ti diatur parti nya di Baleh kena pun bulan September tu tadi, Wong madah, iya bisi betemu enggau ketuai raban bansa di menua nya nyengkaum kepala pengajar ba beberapa buah sekula di pelilih menua nya.

"Aku berasai sinu ninga sebana enggau pemar ke ditapi peranak menua dia dalam pengidup sida besesehari,  lalu siti perengkaguna ke nyata amat diguna sida sekumbang dalam timpuh Atur Nagang Pemindah (PKP) tu iya nya bungkur  Internet," ku iya.

Bedau lama udah, iya madah berita ti dikerembai bekaul enggau pengajar Sambau Dugat ti nguluka seraban nembiak sekula primari enggau sekondari ari genturung pendiau iya di Nanga Sumpa enggau Nanga Jambu semak Lubok Antu, ke bedarat nerasa kampung ketegal ngiga bungkur Internet ke manah.

"Tu kebenar iya batang penanggul ba semua kandang menua di menua pesisir enggau ulu entigis Sarawak ke nadai perengkaguna tauka bungkur Internet.

"Baka ni pekara tu tadi nyadi ba sebuah nengeri ti pemadu kaya di Malaysia  ke ngumbuan mayuh pengeraja asal ?," tanya iya.

Pengudah mulaika diri ari nyin, Wong madahka iya enggau Kaunsil Presiden PSB udah ngaga pememutus ngelekatka sambung 'broadband' satelit WiFi ba menua pesisir di serata  nemgeri kelebih agi ba sekula, lalu nya deka dipejalaika enggau lengkas.  

Iya nyemetak madah, PSB komited nyendiaka komunikasyen enggau servis Internet ke patut laban sida ngagaika nya beguna kelimpah ari ai, elekterik enggau jalan alun ngagai peranak di menua pesisir.  

"Nyendiaka sambung 'broadband' satelit WiFi ngagai menua pesisir endang siti ari pengawa keterubah kami ari mayuh agi   inisiatif ke bukai, kena ngangkatka kualiti idup rayat," ku iya.

Kaban Kunsil Nengeri Bawang Assan nya madah, PSB deka nguji nyendiaka pelajar ke meruan agi, muka pengawa puang ke manah kena nambahka penatai pemisi, nyaga pemanah pengerai enggau pengawa berumah nyengkaum perengkaguna ke chukup baka ai enggau elekterik sereta rampa endur diau ke lebih kondusif.

"Enggau jaku pandak, mantupka juluk ati rayat ke deka bisi pengidup ke manah agi endang nyadi batang juluk politik  kami.

"Nadai orang patut bisi tinggal," ku iya.

Advertisement