Anda di sini

Program i-Sinar diatu dibuka ngagai semua kaban KWSP, maksimum RM10,000 tau dipansutka

Advertisement
 Zafrul lebuh bejaku ba aum ketiga Penggal Ketiga Parlimen ke-14 di Begunan Parlimen kemari. — Gambar Bernama
NUTUP JURAI: Zafrul lebuh bejaku ba aum ketiga Penggal Ketiga Parlimen ke-14 di Begunan Parlimen kemari. — Gambar Bernama

KUALA LUMPUR: Program i-Sinar diatu dibuka ngagai semua kaban Kumpulan Wang Simpanan Pekerja (KWSP) ke ngembuan penyampau lebih lapan jutaiku, ti napi penanggul ba penatai pemisi engagu penyampau  ti tau dipansutka maksimum nambah ngagai RM10,000.

Menteri Wang, Tengku Datuk Seri Zafrul Abdul Aziz madah, enda ngira sekali kaban KWSP nya nadai agi kereja tauka bisi kusut penatai pemisi, sida tau ngeluarka duit ari Akaun 1.

“Enda ngira sekalika kaban KWSP nya gawa ba sektor formal tauka kereja kediri empu, enda ngira kaban nya aktif mayau tauka enda.

“Seagi bisi balat penanggul ba penatai pemisi, tau ngemansutka duit galau ari Akaun 1 KWSP,” ku iya lebuh nutup jurai Rang Undang-undang Perbekalan 2021 di Dewan Rakyat, kemari.

Ku iya, orang ke bisi mayar nya ngelama tu tau datai ngagai pampang KWSPsereta mai garuh nadai agi kereja, notis tauka kemisi nadai gaji, diputung gaji enggau elawin tauka gawa lebih jam, tauka bisi kurang ba penatai pemisi nyema gawa kediri, ke alai sida mega tau minta nengah ‘online’.

Ku Tengku Zafrul, perintah deka mendingka semua sebana kaban KWSP nyengkaum penemu ari Kaban Parlimen bekaul pinta enggau penetap ti kelalu balat terit.

Tetiap atur ti bekaul enggau pengawa ngemansutka duit ari  KWSP, patut digaga enggau chara ke manah ngambi pulaika pemaik ngagai semua kaban, sekalika ngagai sida ti deka ngemasutka nya enggau ti enggai ngemansutka nya, ku iya.

Ku iya baru, nyadi tanggungpengawa perintah ngiga titik penyemaka entara pematut ngemansutka nya diatu enggau pengelikun maya ke udah pinchin ila.

“Majoriti duit ti bayar ngagai KWSP deka diperanakka dalam instrumen beranakka nya ungkup timpuh ke panjai, ukai ba mata duit. Nya kebuah, lebuh ngemansutka nya ba maya ti enda dipelaba baka ke diatu, deka diperundingka silik.

“Semua isu bekaul Akaun 1 KWSP endang berindik ari siti titik penyemaka entara ngemansutka nya ngambika bisi dikena  beridup enggau ke pengelantang maya ti udah pinchin jemah ila ,” ku iya.

Program i-Sinar sebedau tu semina ngemendarka urung dua juta iku kaban KWSP ngemansutka duit ari nya, enggau tatak penyampau ti tau dipansutka RM9,000, bepanggai ba laluh duit nya dalam Akaun 1. — Bernama

Advertisement