KUCHING: Atur Nagang Pemindah Ke Bisi Penetap (PKPB) di Pelilih Menua Kuching ti udah dipejalaika berengkah ari 9 November 2020 diketuka sehari tu (Hari Lima), pia ku Komiti Mutarka Penusah Ngenyit Nengeri Sarawak (JPBNS).
Komiti nya nengah penerang berita kemari, nya beratika Pelilih Menua Kuching udah betukar ari status Mirah ngagai Oren.
"Ari penyampau kes berampit di menua tu ti diripotka bisi 30 kes nyentuk ke sehari tu (kemari), JPBNS ngaga pemutus ke alai PKPB di pelilih Kuching diketuka berengkah ari 27 November 2020 (Hari Lima) pukul 11.59 malam," ku iya.
Ngena peluang tu, komiti deka meri terima kasih ngagai semua ejensi enggau semua peranak di pelilih menua Kuching.
Kelebih agi ngagai kerejasama nentuka prosedur Operasyen standard (SOP) ti dipejalaika kena nentuka kes berampit ditu ulih ditagang, ku iya.
Berebak enggau nya, bekaul enggau ripot bejalaika pengawa matau sekumbang PKPB di pelilih menua Kuching, JPBNS madah naka kemari bisi 8,654 entukar udah di peresa di Kuching.
"Tu ngujugnka penyampau kumulatif entukar ti diperesa iya nya 123,261 lalu nadai perengka pengangkut diasuh nikal pulai.
"Semua penyampau entukar ke diasuh nikal pulai kenyau ari 9 November 2020 mengkang kekal 613 buah," ku iya.
Komiti nya mega madah, kemari polis udah nangkap siku indu rayat Indonesia di Lawas ketegal ngelanggar SOP enda ngena sengkabung idung enggau mulut.
Kelimpah ari nya, bisi lima notis kompaun udah dikeluarka, iya tiga dikeluarka di pelilih menua Padawan lalu di Miri engau Sarikei, bela siti notis.