KUCHING:Pelin perintah nengeri ti deka mindahka 260 buah sekula ba tebing sungai ke palan ti tinggi udah tentu ngurangka pengirau ati apai indai sentang pengelikun anak sida ti belajar ba sekula nya.
Sapit Chairman Mimbar Permuafakatan Ibu Bapa Malaysia (MAPIM) Sarawak Datuk Rozalix Edi Wahab madahka projek nya mega ulih mantu isu sekula reuk di nengeri tu.
“Baka ti ditemu sekula tebing sungai tu iya nya mega sekula repuk ba menua pesisir, lalu nyema dipindahka ke palan ti tinggi agi lalu penusah ampuh bah, paling enda ulih dikurangka.
“Kedua risiko nembiak labuh ke dalam sungai tauka kena serang baya mega ulih dikurangka. Lalu tu mega ulih ngurangka tating penusah bala pengajar dalam matau tetiap pemindah sereta aktiviti bala nembiak sekula,” ku iya lebuh ti ditanya kemari.
Ku iya nambah, enggau mindahka palan sekula nya ke kandang tanah tinggi aktiviti lumba enggau main sereta kokurikulum nembiak sekula nadai bisi taka agi.
“Tu endang siti pekara ti udah lama dikearapka, MAPIM nengeri nerima mayuh sebana tauka ripot apai indai ari Kapit sereta mega Samarahan nyengkaum ba Tanjung Tuang, anak sida besekula ba sekula ti bepalan ba tebing sungai.
“Nyema sekula tu dipindahka, tu mega ari sukut fizikal nya nyadi sekula baru sereta tikas pemanah pelajar deka manah agi laban rampa pelajar ti lantang enggau kondusif.
“Ngarika apai indai semua, aku meri besai terima kasih ngagai perintah nengeri ba pelin ti manah tu lalu nya ulih nyadi nyata dalam timpuh enda lama agi,” ku iya.
Iya madah munyi nya maya dipinta meri buah penemu bekaul penerang Menteri Pelajar, Sains enggau Pansik Teknologi Dato Sri Michel Manyin Jawong ba siti pengerami di Kota Samarahan kena Hari Tiga, 260 sekula primari ba tebinga sungai deka dipindahka ke palan baru ti tinggi agi.
Ku Manyin nambah, mindahka sekula nya endang dikemeratka perintah nengeri diatu berindik ari seruran napi penanggul penusah ampuh bah ninting musim pengujan.
Gempung Gerempung Pengajar Bumiputera Sarawak (KGBS) mega nerima manah sereta nyukung penuh projek perintah nengeri ari baruh Gabungan Parti Sarawak (GPS).
Presiden KGBS Ahmad Malie madahka sida endang muji pengawa proaktif perintah nengeri dalam nentuka begunana enggau prasarana sekula seruran likun ninting kali musim pengujan.
“KGBS madahka pengawa perintah nengeri tu siti singkang ke mua laban 260 buah sekula primari di Sarawak seruran dituntung penusah ampuh bah maya musin pengujan.
“Nyema bisi penusah ampuh bah udah tentu mayuh fizikal enggau prasarana sekula rusak, tu udah tentu begunaka agih belanja ti besai ba pengawa ngemanahka sekula nya.
“Baka ti dipadahka biar mih ngemansutka agih belanja ti besai sekali aja ari ti betapi enggau penusah ti sama ninting taun enggau agih belanja ti mayuh agi,” ku iya.
Iya pechaya raban di sekula, kelebih agi pengajar mega sama andal ati sereta nerima manah pekara tu laban pejalai projek nya deka nentuka rampa pelajar sereta belajar ti manah agi.