KOTA SAMARAHAN: Universiti Teknologi MARA (UiTM) nengah Pampang Sarawak nyukung inisiatif perintah Sarawak ba pengawa mai pemansang ngagai ekonomi nengeri tu.
Mandal Chancelor UiTM Emeritus Prof. Datuk Ir Dr Mohd Azraai Kassim madahka, UiTM endang seruran nyadi penyukung besai perambu perintah kena nguna peluang ngambika ulih mai pemanah ngagai komuniti dalam ekonomi enggau rama.
“Universiti kami tu, nengah pampang Sarawak udah tentu nyukung inisiatif perintah nengeri Sarawak, ti mantu megai tanggungpengawa ti berat sentang mai pemansang ekonomi nengeri tu.
“Nya alai, dikearapka asil ari aum besai tu ukai semina ulih nempa kerejasama ‘inter-disciplinary’ entara UiTM enggau raban antarabansa kami, tang mega nempa kerejasama ti lebih tegap entara universiti-perintah-industri.
“Aku ngarapka pesereta deka ngena manah penau tauka pemandai ke bisi ba bala pengelicha dalam aum besai tu sereta nyadi sebagi ari orang ti enggau mutarka pemar ketegal penyadi COVID-19,” ku iya nengah ‘Live Recording’, kemari.
Iya madahka pekara nya lebuh ti meri jaku pengelalu ba atur pengawa ‘International Conference On Innovative Sciences and Technologies For Research adn Education (InnoSTRE) Hybrid Conference 2020’ ti diatur UiTM Sarawak ba Dewan Jubli UiTM Sarawak ditu.
Aum besai nya ti ngena tema ‘Innovation Sciences and Technologies in the Sustainability of Future Global Economy in Embracing Post COVID-19 Challenges’ dipenyadi Kepala Menteri Datuk Patnggi Abang Johari Tun Openg.
Aum besai nya diatur nengah kerejasama Anhui Medical University, China enggau Asia China Education and Culture (ACEC) Association.
Dulu ari nya, Rektor UiTM Sarawak Prof Datuk Dr Jamil Hamali dalam jaku pengelalu iya madahka UiTM diatu benung chakah bejalaika kerejasama ba pengawa mansik begulai enggau raban ejensi menua tu enggau menua luar.
Iya madah, beguna amat universiti sama mai penyulut ke ulih ngerembaika visibiliti universiti dunya nengah kerejasama pemansik, inisiatif pengawa dagang enggau pelajar inovatif laban UiTM deka nempa gaya runding enggau ngubah pengidup raban bansa.
“UiTM diatu bebendar tauka chakah bejalaika kerejasama ba pengawa pemansik enggau raban ejensi menua tu enggau menua luar.
“UiTM Sarawak bebendar nyukung UiTM Shah Alam ti nyadi kampus besai dalam inisiatif nambahka pemanah penuduk universiti tu ba penuduk semua universiti.
“Kami diatu ba penuduk entara 651-700 dalam QS World University Ranking, ti majak manah nintinh taun, dibantu penambah ba skor MyRA kami,” ku iya.
Kelimpah ari nya, Konsulat Jeneral Republik China di Kuching Cheng Guangzhong mega madahka kerejasama entara China enggau Sarawak ngayanka asil ke chukup mayuh dalam mayuh bengkah bidang.
Dalam timpuh tiga taun ke udah di Sarawak, iya madah diri chukup gaga ati enggau pemansang pelajar di Sarawak.
“Aku ngarapka aum besai tu deka ulih nyerungkai pekara ti beguna kena ngelakuka pengawa besilih nembiak entara China enggau menua ASEAN sereta ngangkatka kaul entara raban bansa kitai.
“Konsulat Jeneral China di Kuching deka terus bejalaika pengawa nyadi penyambung enggau meri servis enggau ngemuntangka Sarawak nempa kerejasama China dalam mayuh bidang,” ku iya.