Anda di sini

260 buah sekula ba tebing sungai di Sarawak dipindah ngagai palan ti tinggi

Advertisement
MANYIN
MANYIN

KOTA SAMARAHAN: Perintah Sarawak nengah Opis Menteri Pelajar, Sains enggau Pansik Teknologi deka mekuh ngagai pengawa mindahka urung 260 buah sekula ti ba semanjai tebing sungai ngagai alai ke tinggi agi.

Menteri iya, Datuk Amar Michael Manyin Jawong madahka, laban sekula ti semak enggau sungai nya endang tiap taun betapi enggau penusah ampuh bah sereta perintah ngeluarka mayuh belanja kena mantu.

Taja pia ku iya, pengawa deka mindahka 260 buah sekula di semanjai tebing sungai nya ngagai endur baru begunaka timpuh ti lama.

“Siti pekara ti dikemeratka diatu, urung 260 buah sekula ke bisi ba semanjai tebing sungai ke suah betapi enggau penusah ampuh bah tiap taun.

“Aku ngasaika sekula nya patut dipindahka ngagai alai tauka tanah ke lebih tinggi, nadai jalai kitai deka ngemanahka agi laban tiap taun sekula nya betapi enggau penusah ampuh bah ketegal ai sungai ti tinggi.

“Deka mindah ngagai alai ke baru kitai begunaka timpuh laban deka nentuka palan sereta palan tauka tanah nya patut bisi pemendar ari Opis Tanah enggau Survei lalu semua utai tu begunaka timpuh urung setaun tauka dua taun,” ku iya.

Manyin madahka pekara nya lebuh dikerandau raban pengarang berita pengudah iya ti ngulu ‘International Conference on innovation Sciences And Technologies For Research and Education (InnoSTRE)  Hybrid Conference 2020’ ti diatur UiTM Sarawak ba Dewan Jubli UiTM Sarawak ditu, kemari.

Dulu ari nya lebuh ti ngenang bekaul enggau belanja ari perintah nengeri RM1 bilion dikena nyeruri enggau ngemanahka agi sekula ti udah balat repuk ba nengeri tu, iya madahka renggat ketiga duit nya deka diberi ngagai perintah besai enda lama agi.

Nitih ku iya ari penyampau RM1 bilion nya renggat keterubah (RM350 juta) enggau kedua (RM350 juta) udah diberi ngagai perintah besai sebedau tu.

“Kitai agi bisi laluh iya nya RM300 juta (renggat ketiga) ti dikena sekalika nyeruri tauka ngemanahka agi 55 buah sekula serata Sarawak.

“Kitai deka ngemansutka duit nya enggau lengkas ngagai Opis Menteri Pelajar Malaysia enda lama agi, engka  bulan tu tauka bulan baru.

“Enggau tu, kitai deka ulih mungkur urung lebih ari 50 peratus sekula ti udah balat repuk ba Sarawak,” ku iya.

Nambahka nya Manyin mega arap bendar enggau Bajet 2021 penyampau semua sekula ke balat repuk ba Sarawak ulih dikurangka.

Iya mega beterima kasih ngagai perintah besai ti bisi ngungkupka belanja ngagai sekula di nengeri tu nengah Perambu Belanja 2021.

Kelimpah ari nya lebuh ti ngenang pasal perintah nengeri ti deka nyendiaka komputer Raspberry PI ngagai semua 1,265 buah sekula primari di Sarawak, Manyin madahka tuju endang kena ngurangka takah entara mengeri enggau menua pesisir ba akses ngagai kompuer digital.

Iya madahka sempekat udah disain enggau Sarawak Information System Sdn Bhd (SAINS) iya nya sebuah Goverment Link Company (GLC) ti deka meri komputer Raspberry PI nya.

Komputer Raspberry nya bebida enggau komputer selama tu lalu SAINS deka  mangku tanggungpengawa nyaga, nyadung, masang, meri latih enggau meri jamin tiga taun, lalu nyema komputer nya jai deka diganti terus, ku iya.

“Deka nepuka program enggau meri latih iya nya pemadu mar laban kitai bisi 1,265 buah sekula ke tebal agi di menua pesisir.

“Aku ngasaika nadai kompeni bukai deka ngambi tu, tang GLC tu iya nya SAINS meri rega ke patut. Tu dibayar ngagai SAINS,” ku iya lebuh nerangka kebuah komputer nya mar rega.

Advertisement