KUCHING: Opis Bekal (JBALB) deka terus bekerejasama enggau pengari rayat kena nentuka bekal ai ti nanggul sekeda kandang endur ulih diputarka enggau manah agi.
Menteri Muda Bekal AirDatuk Dr Abdul Rahman Junaidi madah, baka selama pengari rayat deka nemu tetiap penanggul nyengkaum bekal ai ba sitak sida.
“Kitai begunaka semua penerang ari pengari rayat laban sida amat arif nemu sentang penanggul nyengkaum bekal ai ba sitak sida.
“Nya siti ari pengawa ke patut digaga kitai ngambika tetiap projek ke bekaul enggau bekal ai ulih dipejalaika enggau manah,” ku iya lebuh bejadi Opis JBALB Bagi Menua Sri Aman di Sri Aman, kemari.
Dr Abdul Rahman ke mega Menteri Muda Pekara Islam enggau Dewan Bandaraya Kuching Utara (DBKU) nambah, JBALB mega begunaka kerejasama enggau ejensi bukai baka Lembaga Air Kuching, Lembaga Air Sibu, LAKU Management Sdn Bhd.
Ku iya, nya kena nentuka juluki ati perintah Sarawak mekalka ai beresi ngagai tetiap ruang bilik manggai ba taun 2025 ulih dikemujurka.
“Kami benung nguji mekal ai beresi 100 peratus manggai ba taun 2025.
“Ke tuju nya, kita patut chakah agi nentuka juluk ati perintah Sarawak ulih dijapai,” ku iya.
Ku iya baru, maya bejuraika Bajet 2021, Kepala Menteri Datuk Patinggi Abang Johari Tun Openg seruran ngemeratka sukut negapka pemansang menua pesisir nyengkaum bekal ai.
Sentang pengerami, Dr Abdul Rahman madahka pengawa muka opis JBALB baru di Sri Aman ulih mantu opis nya mekalka ai beresi enggau manah agi.