KUCHING: Opis Menteri Dagang Dalam Nengeri enggau Pekara Penguna (KPDNHEP) deka beratika silik isu rega bawang ke majak niki diatu ti ngujungka bala penguna besebana.
Menteri Dagang Dalam Nengeri enggau Pekara Penguna, Datuk Seri Alexander Nanta Linggi madah, sida komited mutarka isu nya lalu seruran ngiga chara ke pemadu manah kena mutarka nya.
“Baka barang ti diguna ke bukai, rega bawang nyadi baka ketegal faktor stok enggau peminta, lalu enti stok nya majak kurang sereta enda tetangkupka peminta ke mayuh, nya tentu ngasuh rega nya niki ba makit dagang.
“Tu nyadi ba bawang India, ti lalu meri empas ngagai semua stok bawang di menua tui, kelimpah sekeda bansa bawang baka bawang Holland,” ku iya ba sebengkah penerang, kemari.
Ku iya, raban penerit adat ari opis menteri nya deka majak meresa sereta ngemata ba semua renggat nyangkaum pemekal, pemurung enggau perunchit ba pengawa mutarka isu nya.
“Kami enda kakang ati bejalaika pengawa nyaga rega kena mutarka isu rega bawang ke majak mar di menua tu nyema bisi pematut bejalaika nya.
“Tu bisi ari baruh ‘Perintah Kawalan Harga dan Antipencatutan (Penentuan Harga Maksimum) (No. 2) (Ubah) 2020’,” ku Nanta.
Ke rikod, stok bawang di menua tu diimport ari 29 buah menua, ke alai lima menua nya pengeskport ke pemadu besai iya nya India 36 peratus, Pakistan (23 peratus), China (19 peratus), Belanda (9 peratus) enggau Thailand (7 peratus).
India ngerikodka penyampau ngeksport bawang sepenyampau 149,539,411 kilogram ke menua tu, nitihka gaya peminta ke tinggi berindik ari ‘trend’ pemakai rayat menua tu.
Taja pia, Perintah India kena14 September tu tadi udah ngemansutka notis tagang ngeksport semua bansa bawang kelimpah ari bansa Bangalore Rose enggau Krishnapuram, ke nangkup guna domestik sida, berindik ari penusah ampuh bah ti nyadi di menua nya.
Berindik ari nya, 121 kompenit pengimport berengkah nambahka penyampau import stok bawang ari menua baka Pakistan, China, Belanda enggau Thailand.
Ari semua nya, Malaysia ngimport lapan bansa bawang iya nya bawang mit mirah (India), bawang besai (India), bawang mirah (China), bawang mit mirah (China), bawang mit mirah Rose, bawang mit mirah (Myanmar), bawang mit mirah (Thailand) enggau bawang besai kuning (Belanda tauka dikelala agi enggau nama bawang Holland).
Ku Nanta, Malaysia ngimport bawang ari mayuh menua ti nyadi chara strategik kena nentuka stok semampai chukup, sraya nyeliahka ari semina bepanggai ba sebuah menua aja.
“Kebuah pia, enti menua pengeksport nya bisi napi penusah ngenyit tauka ditagang ari sukut ekonomi, kitai nadai napi pemar lalu stok mega seruran bisi taja pan bis empas ba rega iya,” ku iya.
Pengawa ngimport bawang endang ari baruh jaga Opis Menteri Betanam Betupi enggau Industri Pemakai (MAFI), lalu KPDNHEP bejalaika pengawa nentuka nadai aktiviti kelalu balat ngambi untung tauka nikika kelalu balat nikika rega, kelimpah bsi stok belama.
Berebak enggau nya, mensia mayuh diperangsang ‘download’ aplikasyen ‘Price Catcher’ kena mantu sida beratika rega barang ke diguna, kelimpah milih premis dagang nyual enggau rega ke patut.
KPDNHEP mega bisi nyendiaka mayuh macham chara nyengkaum ngena emel [email protected]; aplikasi Ez ADU engga tau betelefon ngagai, 1800 886 800, ngambika mensia mayuh nyamai agi ngenataika pemadah enggau sebana.
Sebana mega tau dikenataika nengah lumur 03-8882 6245/03-8882 6088 (Pusat Arahan Penguatkuasaan KPDNHEP); 03-8000 8000 (Pusat Panggilan Kerajaan Malaysia) enggau Whatsapps, 019-279 4317.