KUCHING: Timpuh Atur Nagang Pemindah Nitihka Penetap (PKPB) ba Pelilih Menua Kuching deka dilanjar ngagai 27 November tu.
Sapit Kepala Menteri Tan Sri Datuk amar James Jemut Masing madahka pekara nya udah diputuska dalam Aum Komiti Mutarka Penusah Ngenyit Nengeri Sarawak (JPBNS) kemari.
“Dalam timpuh 14 hari ke udah agi bisi 58 kes positif di kandang menua tu ba Pelilih Menua Kuching.
“Kes berampit tu enda mekuh ba sekeda kandang menua aja. Nya alai pengudah mansik risiko, timpuh PKPB ba Pelilih Menua Kuching dilanjarka ngagai 27 November (Hari Lima),” ku iya ba aum media ditu.
Sama bisi datai Menteri Pengelantang Pendiau, Pengelantang Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah enggau Direktor Opis Pengerai Nengeri Dr Chin Zin Hing.
Taja pia, mitih ku Masing ti mega Pemangku Chairman JPBNS, nyema dalam timpuh ti dilanjar PKPB tu, komiti ngasaika enda ibuh deka neritka PKPB, timpuh nya ulih diketuka sebarang maya.
Bekaul pemindah keluar enggau tama ngagai Pelilih Menua Kuching, Masing madahka nya enda dikemendar semina enti bisi pengawa rasmi tauka ungkup tuju bejalaika pengawa aja.
Surat enggau pas kereja ari ketuai opis tauka pengaji udah chukup ungkup tuju nya.
Ungkup kes penusah ngenyit, ku iya, tu dikemendar tang mesti minta permit ari polis.
Masing mega madahka timpuh ngelanjar bakani chara deka tama ke Sarawak ari JPBN nyentukka siti timpuh ti deka dipadahka jemah ila.
Enggau pemutus ngelanjarka timpuh tu, ku iya, ungkus kuarantin deka dibayar perintah nengeri lalu ke ukai rayat Sarawak deka mayar kediri.
Masing mega madahka penyampau orang dalam entukar kediri empu iya nya nitihka pemesai perengka pengangkut lalu enda agi semina tiga iku aja.